Kekýshınkaı karateden álem chempıonatynda Qazaqstan quramasy ekinshi oryndy ıelendi
ORAL. QazAqparat - Japonııanyń Okınava qalasynda kekýshınkaı karateden márege jetken tórtinshi álem chempıonatynda Qazaqstan quramasy ekinshi oryndy enshiledi, dep habarlaıdy «QazAqparat» HAA tilshisi.
Osy dodaǵa Oraldan barǵan Solongo Ishannyń aıtýynsha, kekýshınkaı karate túrleri ishinde eń bedeldisi sanalady. Tórt jylda bir ret ótetin álem chempıonatyna bul joly qyryqtan astam eldiń úzdik sportshylary qatysty.
Qazaqstan quramasy kekýshınkaı karate tarıhynda tuńǵysh ret júldeler alyp qana qoımaı, jalpykomandalyq esepte ekinshi orynǵa qol jetkizdi. Japonııa quramasy 3 altyn, 1 kúmis, 1 qola medalmen kósh bastasa, qazaqstandyqtar 2 kúmis, 1 qola júldeni jeńip aldy. Úshinshi oryndaǵy Kanadanyń enshisine bir qola júlde ǵana tıdi. Erler absolıýtti salmaq dárejesinde kúsh synassa, áıelder 60 kelige deıin jáne odan joǵary eki salmaqta sheberlik baıqasty. Bas bapker Tájimurat Naızabekov jattyqtyratyn Qazaqstan namysyn 5 er, 6 áıel qorǵasa, sonyń ishinde Solongo Ishan 60 keliden joǵary salmaqta, Tımýr Raıymbekov absolıýtti salmaqta ekinshi, Anar Súıindikova 60 kelige deıingi salmaqta úshinshi oryndy ıelendi.
«Men chempıonat barysynda tórt jekpe-jek ótkizdim. Mıanma, Brazılııa, Kanada elderinen kelgen qarsylastarymdy utyp, fınalda japonııalyq qyzǵa ǵana ese jiberdim. Munyń aldynda salmaǵy júz keliden asatyn, boıy da uzyn brazılııalyq sportshymen kezdesýim aýyrlaý tıdi de, sońǵy synǵa tolyq kúshimdi jınaı almadym. Jalpy, aıta keteıin, Qazaqstannyń bul jetistigin tarıhı tabys deýge bolady. Óıtkeni tek Japonııada ótkiziletin atalmysh týrnırde buǵan deıin Qazaqstan ǵana emes, ózge elderdiń ókilderi de fınalǵa deıin jetip kórmegen. Buryn japondyqtar fınalda ózara kúsh synasatyn. Sondyqtan bizdiń jeńisimizge úles qosqandardyń bárine shyn júrekten alǵysymdy aıtamyn», dedi «QazAqparat» tilshisine Okınavadan habarlasqan Solongo Ishan.
Eske sala keteıik, karate 2020 jyly ótetin Tokıo Olımpıadasynyń baǵdarlamasyna engizilgeni belgili. 
