Kekshil polıtsııa ofıtserin qolǵa túsirý úshin Kalıfornııa bıligi mıllıon dollar tigip otyr
ASTANA. 11 aqpan. QazAqparat - Los-Andjeles qalasynyń polıtsııa bastyǵy - Charlı Bek jeksenbide Kalıfornııa turǵyndarynan úsh adamnyń ólimine qatysy bar degen kúdiktini, ıaǵnı, izdeýde júrgen burynǵy polıtsııa ofıtseri - 33 jastaǵy Krıstofer Dornerdi qolǵa túsirý úshin járdem surady.
muslim.kz saıtynyń jazýynsha, polıtsııa kúdiktininiń qaıda jasyrynǵanyn jarııa etken adamǵa 1 mln dollar syılyq beriletinin málimdedi. Bul qarajat shtat tarıhynda eń úlken syıaqy bolyp tabylady.
Polıtsııa bastyǵy Bıg-Bear taýynda bolǵan izdestirý sharasynyń sátsiz aıaqtalǵanyn jasyrmady.
Kalıfornııa, Nevada, Arızona shtattarynyń polıtsııalary ózin «polıtsııa qatarynan zańsyz shyǵardy» dep, qoǵamǵa maıdan ashqan teńiz jaıaý áskeriniń zapastaǵy sarbazyn áli izdestirip jatyr. 40-tan astam Los-Andjeles polıtsııa qyzmetkerleri men otbasylarynyń ómirine qaýip tónýine baılanysty olarǵa kúzet qoıyldy.
San-Bernardıno kaýntı eldi mekenindegi taýly aımaqtardy súzip shyǵý úshin 200-den asa adam izdeý sharasyna tartylyp, tikushaq iske qosyldy. Sondaı-aq, ıisshil ıtterdi de paıdalanyp, iz kesýde. «Biz ár qaltarys-bultarysty qaraımyz. Bizdiń tehnıka adam turmaq, qoıannyń kójegine deıin tabýǵa kómektesedi. Alaıda, ázirge nátıje bolmaı tur», - dedi polıtsııa ókili.
Aqpannyń 7-i kúni Korona qalasynda qylmyskerdiń qolynan bir polıtsııa qyzmetkeri qaza taýyp, eki saqshy jaraqat aldy. Sonymen qatar, zeınetke shyqqan burynǵy polıtsııa kapıtanynyń balalaryna da jábir kórsetken.
