Kek almaq bolǵan: Satbaevta qarýdan oq atqan jigit ustaldy

SÁTBAEV. QazAqparat - Sátbaevta jas jigit janjaldasqan adamynan kek alý maqsatynda jeke úıdiń qaqpasyna oq atqan. Alaıda úılerdi shatastyryp alǵan, dep habarlaıdy QazAqparat tilshisi.

Qaraǵandy oblysy Sátbaev qalasynyń polıtsııa bólimine belgisiz tulǵa atys qarýyn qoldanyp, jeke úıdiń metall qaqpasyna oq atqany týraly habarlama túsken. Oqıǵa ornyna birneshe mınýttan keıin jedel-tergeý toby jetti.

Belgili bolǵandaı, turǵyn úıde 57 jastaǵy otaǵasy, onyń 49 jastaǵy áıeli jáne eki balasy bolǵan. Atys bolǵan kezde bári uıyqtap jatqan. Krımınaldyq polıtsııa qyzmetkerleri beınebaqylaý kamerasyn qaraý kezinde úıdiń janynan ótip bara jatqan kólikti anyqtady. «Іzin sýytpaı» atalǵan avtokólik quraly ustaldy. Rýlde bolǵan 18 jastaǵy jigit qaqpaǵa oqty onyń 19 jastaǵy tanysy atqanyn málim etti. Sondaı-aq, polıtseıler olardyń kóliginen tegis uńǵyly myltyq taýyp, tárkiledi.

«Jedel-izdestirý sharalary barysynda jedel ýákilder oq atqan jigittiń ornalasqan jerin anyqtap, ony polıtsııaǵa jetkizdi. Qaskúnem jábirlenýshilermen kórshi turatyn qala turǵynymen dushpandyq qarym-qatynasta bolǵanyn túsindirdi. Ol janjaldasqan adamynan kek almaqshy bolyp, túnde onyń úıine barǵan. Alaıda túnde ol úıdi shatastyryp, bul oqıǵaǵa múldem qatysy joq adamnyń úıine kelip, qaqpasyna oq atqan», - dep habarlady Qaraǵandy oblysy Polıtsııa departamentiniń bastyǵy Erlan Faızýllın.

Atalmysh derek boıynsha QR QK 293-baby «Buzaqylyq» jáne QR QK 287-baby «Qarýdy zańsyz satyp alý, berý, ótkizý, saqtaý, tasymaldaý nemese alyp júrý» boıynsha qylmystyq is qozǵaldy. Tergeý amaldary júrgizilýde. Kúdikti ýaqytsha ustaý ızolıatoryna qamaldy.