KEGOC ońtústik jáne batys óńirlerde elektr jelisin kúsheıtý jobalaryna túsinik berdi

- «Qazaqstan Birtutas elektr energetıkalyq júıesiniń (Qazaqstan BEJ-iniń) Ońtústik aımaǵynyń elektr jelisin kúsheıtý» jobasy boıynsha barlyq jumys óndiristik jumys kestesine sáıkes júrgizilip jatyr. Barlyq 3 qosalqy stantsııa boıynsha negizgi materıaldar 100 paıyz jetkizildi, onyń ishinde 95 paıyzy naqty ornatyldy. Barlyq qosalqy stantsııalarda negizgi jáne kommýtatsııalyq jabdyqtar jetkizildi. «Shý – Jambyl» jáne «Jambyl – Shymkent» áýe jelileri boıynsha qurylys alańdaryna materıaldar jetkizilip, qurylys-montajdaý jumystary júrgizilip jatyr. Іrgetastar men tirekterdi ornatý, symdar men naızaǵaıdan qorǵaıtyn trostardy montajdaý jumystary júzege asyp jatyr, - dedi N. Aıtjanov.

Onyń aıtýynsha, joba iske asqannan keıin Almaty – Jambyl ýchaskesinde jeliniń ótkizý qabileti 1100 MVt-tan 1500 MVt-qa deıin artady.

- «Qazaqstannyń Batys aımaǵynyń energııa júıesin Qazaqstan BEJ-imen biriktirý» jobasy boıynsha jumystar josparǵa sáıkes iske asyp jatyr. Negizgi jáne kommýtatsııalyq jabdyq jetkizildi. «Ólke – Qarabatan» áýe jelisi boıynsha qazirgi ýaqytta tirekterge arnalǵan irgetastardy jetkizý jáne ornatý, áýe jelisi trassasy boıynda aralyq metall tirekter ornatý jumystary jalǵasyp keledi. Joba Batys aımaqty respýblıka aýmaǵy boıynsha Qazaqstannyń Birtutas elektr energetıkalyq júıesimen biriktirý esebinen energııa táýelsizdigin qamtamasyz etedi, - dedi basqarma tóraǵasy.

Budan buryn habarlanǵandaı, el aýmaǵynda 2025 jyly elektr energııasyn tutyný 2024 jylmen salystyrǵanda 4,6 mlrd kVt/saǵatqa nemese 3,8 paıyzǵa artyp, 124,6 mlrd kVt/saǵatty qurady.