KEGOC birneshe óńirde elektr qýatynyń berilmeı qalýyna baılanysty túsinikteme berdi
NUR-SULTAN. QazAqparat – «KEGOC» kompanııasynyń uttyq dıspetcherlik ortalyǵynyń bas dıspetcheri Bekjan Muqatov birneshe óńirde elektr energııasynyń jeliden ajyraý sebepteri týraly aıtty, dep habarlaıdy QazAqparat tilshisi.
«Qazaqstan Respýblıkasynyń Biryńǵaı elektr energetıkalyq júıesi Reseı Federatsııasynyń biryńǵaı energııa júıesimen jáne Ortalyq Azııanyń birikken energııa júıelerimen qanattasyp jumys isteıdi. Elimizde elektr energııasyn tutynýdyń eń kóp mólsheri qazir shamamen 15 myń MVt bolyp otyr. Elektr stantsııalarynda josparǵa sáıkes jóndeý jumystary júrgizilýde. 8 qarashada «Moınaq» GES-indegi eki blok iske qosyldy. Keshe ǵana respýblıka tutynýshylarynyń qajettiligin barynsha qanaǵattandyrý úshin «Jambyl» GRES-inde qýaty 200 MVt bolatyn energetıkalyq blok ta iske qosyldy. Jyl basynan beri respýblıka boıynsha elektr tutyný kólemi ótken jylmen salystyrǵanda 7,2% ósti. Jalpy, «KEGOC» AQ jelilerden energııany ajyratqan joq. Tutynýshylar elektr energııasymen tolyq kólemde qamtamasyz etiledi. Qazir jaǵdaı qalypty», - dedi Bekjan Muqatov brıfıngide.
Bas dıspetcher jýrnalısterdiń suraqtaryna jaýap bere otyryp, qazan-qarasha aılarynda tirkelgen jospardan tys aǵyndar energııa kózderinen qýatty jetkiliksiz mólsherde satyp alý saldarynan týyndaǵanyn túsindirdi.
«Elektr energııasynyń kelisimsharttan tys qabyldanýyn azaıtý úshin aımaqtyq salalyq kompanııalarǵa tıisti buıryqtar berildi. Onyń ishinde, birneshe oblystyń, atap aıtqanda, Qazaqstannyń ońtústigindegi tutynýshylardyń ajyratylýyna alyp kelýi múmkin iri júıeli apattardyń aldyn alý úshin naqty sheshimder qabyldandy», - dedi KEGOC ókili.
Sonymen qatar, ol tutynýshylar energııany is júzinde tutynatyn kólemde satyp alýy tıis ekenin atap ótti.
«Bizde elektr energııasynyń óndiris kólemin arttyrýǵa qajet rezervter Jambyl GRES-inde bar. Tutynýshylar qajetti kólemdi aldyn ala satyp alsa, jospardan tys ajyratýǵa tap kelmeıdi. «Qazaqstan elektr energııasy men qýat naryǵynyń operatory» AQ bazasynda saýda alańyn uıymdastyrdyq. Qazaqstannyń elektr stantsııalary sol jerde rezervtegi qosymsha qýattardy satady», - dedi Bekjan Muqatov.
