KEGOC basshysynyń orynbasary tártiptik jaýapkershilikke tartyldy

ASTANA. QazAqparat – Energetıka mınıstrligi «KEGOC» AQ basshysynyń elektr energııasy naryǵyna jaýapty orynbasaryn tártiptik jaýapkershilikke tartty, dep habarlaıdy QazAqparat tilshisi.

Mınıstrliktiń baspasóz qyzmeti taratqan málimet boıynsha, «KEGOC» AQ elektr energııasynyń naryǵyn naqty ýaqyt rejıminde teńgerimdeıtin avtomattandyrylǵan tetikti ýaqytynda iske qospaı qoıǵan.

«Energetıka mınıstrligi Memleket basshysy Qasym-Jomart Toqaevtyń tapsyrmasy boıynsha elektr energııasy naryǵyn reformalaýdy qolǵa alyp, saladaǵy naryqtyń jańa modelin engizýge baǵyttalǵan zań normalaryn qabyldady.

Mysaly, 2023 jylǵy 1 shildeden bastap Qazaqstanda elektr energııasyn Biryńǵaı satyp alýshy jáne Elektr energııasyn naqty ýaqyt rejıminde teńgerimdeıtin naryq tetigi engizildi», - dep jazylǵan mınıstrliktiń málimetinde.

Vedomstvonyń túsindirmesine qaraǵanda, bul tetik mynandaı máselelerdi sheshýge baǵyttalǵan:

- elektr energııasyn satyp alý jáne satý kezinde alypsatarlyq operatsııalardy boldyrmaý;

- ónimsiz deldaldardy qysqartý;

- shekarada memleketaralyq elektr energııasy saldosynyń aýytqýyn barynsha azaıtý;

- bolashaqta el óńirleri arasyndaǵy elektr energııasyna tarıfterdi teńestirý

«Joǵaryda aıtylǵandardy eskere otyryp, baǵdarlamalyq keshendi iske qosýdyń esepti merzimin buzǵany jáne baǵdarlamanyń tolyq jumys isteýin qamtamasyz etpegeni úshin QR Energetıka mınıstrliginiń basshylyǵy «KEGOC» AQ birinshi basshysynyń jetekshilik etetin orynbasaryn tártiptik jaýapkershilikke tartty», - delingen resmı aqparatta.