KEGOC aktsııalaryna suranys 1,5 ese artqan
«Samuryq-Qazyna» AQ jáne «KEGOC» AQ 28 qyrkúıek pen 2 qarasha aralyǵynda ótken Qazaqstan qor bırjalarynda aktsııalardy qaıtalama ornalastyrý (SPO) qorytyndysyn jarııalady, dep habarlaıdy Kazinform.
«Qazirgi ýaqytta kompanııanyń úlken nesıelik mindettemeleri joq. Kompanııa mindettemeleriniń jalpy somasy 157 mlrd teńge. Barlyq qaryz negizinen teńgemen berilgen. Tek 16 mln dollar, 7, 6 mlrd teńge – valıýtadaǵy qaryzdar. Tıisinshe, kompanııada qaryzdar boıynsha úlken júkteme joq. Sondaı-aq bizde joǵary kredıttik reıtıng bar ekenin atap ótýge bolady», - dedi «KEGOC» AQ Basqarma tóraǵasy Nábı Aıtjanov elordada ótken brıfıngide.
Investorlardan jalpy somasy 34,8 mlrd teńgeden asatyn 50 myńnan astam ótinim túsken. Bul ornalastyrýdyń josparlanǵan kóleminen 1,5 ese artyq.
Aktsııalardy qaıtalama ornalastyrý sheńberinde «KEGOC» AQ 15 294 118 jaı aktsııa ótkizdi. Bul kompanııa ornalastyrǵan aktsııalarynyń jalpy sanynyń shamamen 5,6%-y.
«Jınalǵan ótinimderdi taldaý nátıjesinde 22,6 mlrd teńgeden astam somaǵa ótinimderdi qanaǵattandyrý uıǵaryldy. Bul jarııalanǵan aktsııalardyń shekti sanyna sáıkes keledi – 15 294 118 jaı aktsııa. Bul jumystar buryn jarııalanǵan aktsııalardy bólý krıterıılerine sáıkes júzege asyryldy jáne qomaqty aktsııa paketteriniń jekelegen iri ınvestorlarda shoǵyrlanýyn boldyrmaýǵa baǵyttalǵan. Bul rette Qazaqstan Respýblıkasy azamattarynan kelip túsken aktsııalardy satyp alý jónindegi ótinimder tolyq kólemde qanaǵattandyryldy», - dep tolyqtyrdy N.Jaqypov.
Kompanııanyń habarlaýynsha, SPO-dan túsken qarajat KEGOC-tyń QR Birtutas elektr energetıkalyq júıesiniń Ońtústik aımaǵynyń jelilerin kúsheıtý boıynsha iri ınvestıtsııalyq jobasyn iske asyrýǵa jumsalady.
