«KEGOC» AQ bereshek soma qaıtarylmaǵan jaǵdaıda qyrkúıektiń 17-inen «Shyǵysenergotreıd» JShS-na elektr energııasyn jetkizý qyzmetine 50 paıyzdyq shekteý qoıatyndyǵyn habarlady
ASTANA. Qyrkúıektiń 15-i. QazAqparat /Marlan Jıembaı/ - «KEGOC «Elektr jelilerin basqarý jónindegi Qazaqstan kompanııasy» AQ «Shyǵysenergotreıd» JShS-na aǵymdaǵy jyldyń qyrkúıeginiń 1-shi onkúndigi úshin 35 mıllıon teńge mólsherindegi bereshegin óteý boıynsha tıisti sharalar qabyldaý qajettigin habarlady.
«Shyǵysenergotreıd» JShS-nyń «KEGOC» kompanııasyna bereshegi 2010 jylǵy qańtardyń 10-yndaǵy jaǵdaı boıynsha 182,0 mıllıon teńgeni quraıdy. Bul aqparatty atalǵan kompanııanyń baspasóz qyzmetinen habarlady.
«Júıelik operator Shyǵys Qazaqstan oblysynyń energııamen jabdyqtaý uıymdarynyń nazaryn júkteme barynsha ulǵaıatyn kúzgi-qysqy merzimge daıyndyq kezinde óńiraralyq deńgeıdegi jeliler boıynsha elektr qýatyn jetkizý jáne elektr energııasyn óndirý-tutynýdy teńgerimdeý qyzmetteri úshin bereshek somasynyń artýyna jol bermeý qajettigine aýdarady», delingen baspasóz habarlamasynda.
Jasalǵan kelisimshart talaptaryna sáıkes, bereshek soma qaıtarylmaǵan jaǵdaıda «KEGOC» AQ qyrkúıektiń 17-inde saǵat 12:00-den «Shyǵysenergotreıd» JShS-na elektr energııasyn jetkizý qyzmetine 50 paıyzdyq (60 MVt-qa deıin) shekteý qoıý quqyǵy bar ekendigin habarlaıdy. Kórsetilgen ýaqyttan bastap «Shyǵysenergotreıd» JShS óz betinshe elektr energııasyn jetkizý jáne tutyný mólsherin berilgen kólemge deıin qysqartý sharalaryn qoldanýy tıis. Tutynýshylardy óz ýaqytynda habardar etý jáne shekteý engizilgen ýaqytta bolýy múmkin zardaptar «Shyǵysenergotreıd» JShS-na júkteledi. Aǵymdaǵy bul jaǵdaı týraly ShQO men Semeı qalalyq ákimshilikteri, óńirlik elektr jelisi kompanııasy jáne jergilikti energııa óndirýshi kompanııalar habardar etildi.
