KEGOC 2035 jylǵa deıin 7 myń shaqyrym jańa elektr jelisin salýdy josparlap otyr
ASTANA. KAZINFORM – Premer-mınıstrdiń birinshi orynbasary Nurlybek Nálibaevtiń tóraǵalyǵymen ótken keńeste KEGOC kompanııasynyń qyzmeti men Ulttyq elektr jelisin damytý josparlary talqylandy.
Jıynda Memleket basshysynyń Ulttyq elektr jelisin damytý, iri ınvestıtsııalyq jobalardy iske asyrý, aldaǵy kúzgi-qysqy maýsymǵa daıyndyq jáne energııa júıesin basqarýǵa tsıfrlyq sheshimderdi engizý jónindegi tapsyrmalarynyń oryndalý barysy qaraldy.
Kompanııa málimetinshe, 2025 jyly jóndeý naýqany jospardan 18 paıyzǵa artyq oryndalǵan.
– Investıtsııalyq baǵdarlama aıasynda naqty 99,5 mlrd teńge ıgerildi. Al 2026 jyly ınvestıtsııa kólemi 181,9 mlrd teńge deńgeıinde josparlanyp otyr, – delingen habarlamada.
Qazirgi ýaqytta KEGOC «Qazaqstannyń biryńǵaı energetıkalyq júıesiniń Ońtústik aımaǵynyń elektr jelisin kúsheıtý» jáne «Batys Qazaqstannyń energetıkalyq júıesin Qazaqstannyń biryńǵaı energetıkalyq júıesimen biriktirý» jobalaryn júzege asyryp jatyr.
Prezıdent tapsyrmasyna sáıkes atalǵan jobalardy iske asyrý merzimi qysqartylǵan.
– Jumystar bekitilgen kestege sáıkes júrgizilýde, – dep atap ótti kompanııa ókilderi.
Keńeste Ulttyq elektr jelisin 2035 jylǵa deıin damytýǵa arnalǵan perspektıvalyq jobalarǵa erekshe nazar aýdaryldy.
Olardyń aıasynda elimizde shamamen 7 myń shaqyrym jańa elektr berý jelisin salý kózdelip otyr.
Sonymen qatar KEGOC energııa júıesiniń jumys rejımderin jáne jańartylatyn energııa kózderi óndirisin onlaın baqylaý, boljaý, derekterdi taldaý men óndiristik protsesterdi avtomattandyrý baǵytynda tsıfrlyq jobalardy iske asyrýda.
– Engizilgen tsıfrlyq jáne ıntellektýaldyq sheshimderdiń jıyntyq ekonomıkalyq áseri 16,6 mlrd teńgeden asty, – delingen jıyn barysynda.
Keńes qorytyndysy boıynsha Nurlybek Nálibaev aldaǵy kúzgi-qysqy kezeńge sapaly daıyndyqty qamtamasyz etýdi, negizgi energetıkalyq jobalardyń oryndalý merzimderi men sapasyna baqylaýdy kúsheıtýdi tapsyrdy.
Aıta keteıik, KEGOC ońtústik jáne batys óńirlerde elektr jelisin kúsheıtý jobalaryna túsinik berdi.
