Kegen aýdanynyń bólim bastyǵy 1 mln teńge para aldy degen kúdikpen ustaldy

ALMATY OBLYSY. QazAqparat – Almaty oblysynyń sybaılas jemqorlyqqa qarsy qyzmeti Kegen aýdanynyń turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspektsııasy bóliminiń basshysyn jemqorlyq faktisi boıynsha ustady.

Ol 2022 jylǵy 18 aqpanda Kegen aýdanynyń joldaryn jóndeý boıynsha oryndalǵan jumystardyń aktilerine, sondaı-aq obektilerdi paıdalanýǵa berý aktilerine qol qoıǵany úshin merdiger uıymnyń dırektorynan 1 000 000 teńge somasynda para alǵan, dep habarlaıdy QazAqparat tilshisi QR Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) Almaty oblysy boıynsha departamentiniń baspasóz qyzmetine silteme jasap.

Bıylǵy jyldyń 20 aqpanynda Taldyqorǵan qalasynyń mamandandyrylǵan tergeý soty kúdiktige «kúzetpen ustaý» túrindegi bultartpaý sharasyn sanktsııalady.

«Tergeý jalǵasýda. Ózge aqparat tergeý múddesinde jarııa etýge jatpaıdy»,-delingen habarlamada.