Kedeılik deńgeıi tómendedi - Eńbek mınıstri
ASTANA. QazAqparat - QR Eńbek jáne halyqty áleýmettik qorǵaý mınıstri Mádına Ábilqasymova kedeılik deńgeıin tómendetýge qatysty málimetterdi jarııalady, dep habarlaıdy QazAqparat.
«Áleýmettik kepildikterdi arttyrý boıynsha memleket júrgizip otyrǵan áleýmettik saıasattyń nátıjesinde ómir súrý deńgeıiniń negizgi kórsetkishteri jaqsardy. Qazaqstanda kedeılik deńgeıi 1996 jylǵy 34,6 paıyzdan 2018 jylǵy 2-toqsan qorytyndysy boıynsha 4,7 paıyzǵa qysqardy. Halyqtyń jan basyna shaqqandaǵy nomınaldy aqshalaı tabysy 2001 jyldan bastap 2017 jyl aralyǵynda 10,8 esege ósip, 83 myń 53 teńgeni qurady», - dedi mınıstr Parlament Májilisindegi Úkimet saǵatynda.
Onyń sózine qaraǵanda, halyqtyń tabystar boıynsha teńsizdigi qysqaryp keledi. Djını ındeksiniń máni 2001 jyldan 2017 jyl aralyǵynda 0,287 deıin 1,3 esege qysqardy.
«Kedeılik tereńdigi 2001 jyldan 2017 jylǵa deıin 37 esege, ıaǵnı tıisinshe 14,8 paıyzdan 0,4 deıin, kedeılik ótkirligi - 65 esege, 6,5 paıyzdan 0,1 paıyzǵa deıin azaıdy», - dedi Mádına Ábilqasymova.
Budan buryn habarlanǵandaı, Májilistegi Úkimet saǵatynda QR Eńbek jáne halyqty áleýmettik qorǵaý mınıstri ataýly áleýmettik kómektiń jańa formatyn jetildirý boıynsha usynystar pysyqtalyp jatqanyn málim etti.
