Kedeı jaqsy, baı jaman deıtin prıntsıpten arylýymyz kerek – Aıdos Sarym
ASTANA. KAZINFORM – Quryltaı depýtaty Aıdos Sarym Memleket basshysy Qasym-Jomart Toqaevtyń iri baılarǵa salyq mólsherlemesin kóterý usynysyna pikir bildirdi.
Aıta keteıik, “Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalaǵan Prezıdent Qasym-Jomart Toqaev iri baılyq ıeleri úshin salyq boıynsha joǵary mólsherleme engizý máselesin talqylaıtyn ýaqyt kelgenin aıtqan edi.
Depýtattyń aıtýynsha, Úkimet salyq zańnamasyna engiziletin túzetýlerdi taıaý kúnderi daıyndap, Quryltaı depýtattarynyń qaraýyna usynady. Sol kezde salyq salýǵa qatysty barlyq másele qaralady.
- Kedeı jaqsy, baı jaman deıtin prıntsıpten arylýymyz kerek. Biraq baılyqtyń da ádiletti ólshemi bolý tıis. Mysaly metaldardy, munaıdy alaıyq. Keı kezderi baǵasy sharyqtap ósip, keıde túsip ketetin zaman bolady. Sol kezde kompanııalardan alynatyn salyqtar bar. Sol sııaqty baǵyttardy dıskýssııa arqyly kelistirip sheshýge bolatyn sııaqty. Sonymen qatar bul bıýdjetke taǵy da qosymsha qarjy tartýdyń birden-bir joly, - dedi ol.
Sonymen qatar depýtat eń tómengi jalaqyny kóterý máselesi buǵan deıin Parlament qabyrǵasynda kóterilgenine nazar aýdartty.
- Ol kezde Úkimet «Prezıdenttiń Joldaýyn kúteıik» degendeı ısharat jasaǵan bolatyn. Búgin naqty sheshimin kórip otyrmyz. Bul - júzdegen myń, mıllıondaǵan adamnyń ómirine, turmysyna jaqsy áser etetin, ekonomıkaǵa jańa qarqyn beretin jaqsy qadamnyń biri, - dedi ol.
Esterińizge sala ketsek, búgin Memleket basshysy Úkimetke eń tómengi jalaqy mólsherin 85 myńnan 110 myń teńgege deıin kóterýdi tapsyrdy. Osy mindet kelesi jyldyń 1 qańtarynan bastap iske asyrylýǵa tıis.
