«Kedeı kóp bolmasyn, qystaý bos bolmasyn!»- respýblıkalyq basylymdarǵa sholý

Keshe Almatyda ІH Eýrazııa medıa-forýmy óz jumysyn bastady. Onda adamzatty tolǵandyryp otyrǵan san túrli taqyryp Batys pen Shyǵystyń san alýan saıasatkerleri men jýrnalısteriniń talqysyna túsip, qyzý pikir almasý júrip jatyr. Medıa-forýmda Qazaqstan Prezıdenti Nursultan Nazarbaev sóz sóıledi. «Egemen Qazaqstan» basylymynyń búgingi sanynda «Batys pen shyǵysty toǵystyratyn qazaq jeri - beıbitshilik beldeýi» degen taqyryppen Elbasynyń atalǵan forýmda sóılegen sózi berilipti.

«Sábıt Muqanov tapshyldyq jolǵa túserde raýandap atyp kele jatqan tańnyń ar jaǵynan jarqyrap kún shyǵaryna sendi, basqasha bolady dep qaperine de almady. Qudaı bergen talanttyń syrtqa shyqpasyna sharasy joq. Sáken «Kel, jigitter, bolyńdar er, kedeıden top jasaıyq!» dep urandasa, Sábıt «Bostandyqty» jyrǵa qosty. Kimniń jyrshysy ekenin birden ashyq aıtty, ejiktep túsindirdi». Osylaı oı terbegen «Egemen Qazaqstan» gazetindegi kelesi maqala «Kádimgi Sábıt Muqanov» degen taqyryppen kórnekti qalamger týraly keńinen tolǵaıdy. Maqala avtory - professor Tursynbek Kákishev.

Qazaqstan men Koreı eli arasyndaǵy qarym-qatynastyń órbigenine de biraz jyldyń júzi boldy. Sol baılanystyń jyl ótken saıyn nyǵaıa túsýiniń bir kórinisi retinde Seýlde Qazaqstannyń Koreıa Respýblıkasyndaǵy jylynyń ashylý saltanaty ótti. Egjeı-tegjeıin «Egemen Qazaqstan» gazetindegi «Tańy erte atatyn el» atty maqaladan oqı alasyzdar.

"Ańyzaq", "Qupııa qoıma", "Aıtylmaı qalǵan ańyz", "Jer kindigindegi apat", "Qazyna syry" jáne basqa da kóptegen kitaptardyń avtory, halyqaralyq "Alash" ádebı syılyǵynyń laýreaty Adam Mekebaev bul kúnderi 70 jasqa tolyp otyr. Osyǵan oraı «Egemen Qazaqstan» gazeti qalamgerdiń «Saıaq» atty jańa áńgimesin jarııalapty.

Túrkııanyń kóptegen joǵary oqý oryndary men birqatar memlekettik kitaphanalary qoljazba qorlarynda elimizdiń ortaǵasyrlyq shaharlary men kentterinen shyqqan arystarynyń áli kúnge deıin jaryq kórmegen jáne ara-kidik basylǵan da eńbekteri bar eken. Bul týraly tolyǵyraq «Egemen Qazaqstan» gazetindegi «Túrkııadaǵy jazba jádigerlikterimiz» atty maqaladan oqı alasyzdar.

***

Kúndelikti shyǵatyn «Alash aınasy» gazetiniń búgingi sany negizinen Almatyda ótken toǵyzynshy Eýrazııalyq medıa-forým jumysyn tereńirek taldaýǵa arnalǵan. Alqaly jıyn barysyna baıypty barlaý jasaǵan basylym mańyzdy forýmda aıtylǵan máselelerge jeke-jeke toqtalǵan. Medıa-forýmnyń alǵashqy kúnin jan-jaqty zerdelegen materıaldar toptamasy «Kedeı kóp bolmasyn, qystaý bos bolmasyn!» degen taqyryppen berilipti.

Sonymen qatar, medıa-forýmǵa qatysý úshin Almatyǵa arnaıy kelgen Qyrǵyzstannyń eks-prezıdenti Asqar Aqaevtyń qyzy Bermet Aqaeva «Alash aınasyna» eksklıýzıvti suhbat bergen. Onda, Bermet Asqarqyzy Qyrǵyz elindegi búgingi saıası turaqsyzdyq týraly óz oılarymen bólise kele, «qazirgi qıyndyqtarǵa qaramastan men elimniń bolashaǵyna optımızmmen qaraımyn» degendi aıtady.

Gazettiń búgingi «Oı-kókpar» aıdarynda Almaty qalasynyń turǵyndaryn tirkeýge alýdaǵy jańa tártip tóńiregindegi daýly máseleler kóterilgen. Pikirleri ekige jarylǵan mamandar bul problemalardan shyǵýdyń joldaryn qarastyrýǵa tyrysady. Buǵan qosa gazette alǵan ıpotekalyq nesıeni jabýdyń ońtaıly joldary týrasynda berilgen mamandar keńesi jarııalanǵan.

«Alash aınasy» Uly Jeńistiń 65 jyldyǵy qarsańynda tarıhı-tanymdyq, derekti maqalalar serııasyn úzbeı jarııalap keledi. Bul joly belgili qazaq qalamgeri Kákimjan Qazybaevtyń kezinde jazǵan jaýynger Rahymjan Qoshqarbaev týraly «Reıhstagqa tý tikken qazaq» atty maqalasy jarııalanypty. Sonymen qatar Eýropa qalalaryn azat etýge qatysqan erjúrek qazaqtar jaıynda jazylǵan derekti maqalany da osy Alash aınasynan oqı alasyzdar.

Al, gazettiń «Dat» aıdarynda elimizdiń Densaýlyq saqtaý mınıstri Jaqsylyq Dosqalıevpen keń kólemdi suhbat berilgen. Onda jaqynda qabyldanǵan Biryńǵaı ulttyq densaýlyq saqtaý júıesiniń kemshilikteri men artyqshylary sarapqa salynyp, búgingi qoǵamdy mazalap júrgen birqatar suraqtarǵa dáleldi jaýaptar keltirilgen.

***

Keshe Petropavl qalasyndaǵy bir mektep oqýshysy «el aman, jurt tynyshta» kózsiz erlikke baryp, polıtseılerge qaraqshy uryny ustap berdi. Egjeı-tegjeıin «Aıqyn» basylymynyń búgingi sanyndaǵy «Polıtseıler Ǵabıdendi batyrǵa balap otyr» atty maqaladan oqı alasyzdar.

Aleksandr Lýkashenkonyń qamqorlyǵyna alynǵan Bakıev eldiń taǵy da dúrligýine áser etýi múmkin be?. R. Otýnbaevanyń úkimeti qanshalyqty zańdy quryldy? Osy jáne ózge de halyq kókeıindegi saýaldar tóńireginde órbigen suhbat «Aıqyn» gazetiniń «Aq sóıle!» aıdarynda «Táýelsizdik úshin shynaıy kúres táýelsizdikti alǵan ýaqyttan bastaldy» degen atpen berilipti. Suhbatta saıasatker Erlan Qarın kórshimizde bolyp jatqan saıası ózgerister týraly óz oılaryn ortaǵa salady.

Sondaı-aq atalǵan basylymnyń dástúrli «Qazaqtyń 100 kúıi» aıdarynda Qaıǵyly Naýaıynyń «Naýaıy» atty kúıi tanystyrylypty.