Kedennen 53 mln teńgeniń taýaryn zańsyz ótkizbek bolǵan basshy sottaldy

ALMATY OBLYSY. QazAqparat – Kedennen quny 53,3 mln teńge deklaratsııalanbaǵan taýar ótkizý faktisi boıynsha sotqa deıingi tergeý aıaqtaldy. Bul týraly QazAqparat Qarjy monıtorıngi komıtetine silteme jasap habarlaıdy.

Atalǵan Komıtettiń Almaty oblysy boıynsha Ekonomıkalyq tergeý departamenti qyzmetkerleri «Ekspress-júk» JShS dırektoryna qatysty isti tergedi. Ol «Altyn kól» keden beketi arqyly Qytaıdan Qazaqstanǵa temirjol konteınerlerimen ákelingen, kedendik quny 53,3 mln teńgeni quraıtyn deklaratsııalanbaǵan tutyný taýarlaryn kedennen zańsyz ótkizbek bolǵan.

«Ekspress-júk» JShS dırektory QR QK 234-babynyń 2-b. 4-t. (asa iri mólsherdegi ekonomıkalyq kontrabanda) boıynsha aıypty dep tanyldy. Oǵan múlkin memleket kirisine tárkileı otyryp, 3,7 mln teńge kóleminde aıyppul túrindegi jaza taǵaıyndaldy», - delingen habarlamada.