Kedendik tekserýlerden keıin bıýdjetke 19,6 mlrd teńge tústi
ASTANA. KAZINFORM — Qazaqstanda 2026 jyldyń qańtar-qyrkúıek aılarynda júrgizilgen 948 kedendik tekserý nátıjesinde 29,6 mlrd teńge qosymsha eseptelip, onyń 19,6 mlrd teńgesi óndirip alyndy. Bul kórsetkishter ótken jyldyń sáıkes kezeńimen salystyrǵanda aıtarlyqtaı ósken. Bul týraly QR Qarjy mınıstrliginiń Memlekettik kirister komıteti habarlady.
Memlekettik kirister komıtetiniń málimetinshe, byltyrǵy kezeńmen salystyrǵanda qosymsha eseptelgen somalar 195%-ǵa, al óndirip alynǵan qarajat 247%-ǵa artqan. Kedendik tekserýlerdiń 84%-ynda túrli zańbuzýshylyqtar anyqtaldy.
Olardyń arasynda kedendik qundy durys aıqyndamaý (40%), taýarlardy syrtqy ekonomıkalyq qyzmettiń taýar nomenklatýrasy boıynsha qate synyptaý (20%), paıdalanylýy nemese oǵan bılik etýi shektelgen taýarlardy maqsatsyz paıdalaný (17%) jáne kedendik rásimder talaptaryn buzý (5%) bar.
Anyqtalǵan zańbuzýshylyqtardyń basym bóligi tsıfrlyq maınıngpen aınalysatyn syrtqy ekonomıkalyq qyzmetke qatysýshylarǵa tıesili — 19%. Kóterme saýda salasynda bul kórsetkish 16,2%, kóterme-bólshek saýdada 13,5%, energetıkalyq sýsyndar óndirisinde 4% bolǵan.
Tekserý nátıjesinde kedendik tólemder, salyqtar men ósimpuldar qosymsha eseptelip, deklaratsııalarǵa túzetýler engiziledi. Sondaı-aq zańbuzýshylardy jaýapqa tartý sharalary qabyldanady.
Qazir Qytaıdan «jalpaq metall prokaty» ónimderin ımporttaıtyn birqatar kompanııaǵa qatysty tekserý júrgizilip jatyr. Olar dempıngke qarsy bajdy tóleý mindetin tıisinshe oryndamaýy múmkin degen táýekel tobyna engizilgen.
Eske salaıyq, buǵan deıin Memlekettik kirester komıteti qandaı marketpleısterge jańa kedendik talap qoıylmaıtynyn túsindirgen edi.
