Kedendik statıstıkadaǵy alshaqtyqtardy tómendetýge qatysty sapaly ózgerister joq - komıtet

NUR-SULTAN. QazAqparat – Kedendik statıstıkadaǵy alshaqtyqtardy tómendetýge qatysty sapaly ózgerister joq. Bul týraly QR Parlamenti palatalarynyń birlesken otyrysynda Respýblıkalyq bıýdjettiń atqarylýyn baqylaý jónindegi esep koıtetiniń tóraıymy Natalıa Godýnova aıtty, dep habarlaıdy QazAqparat tilshisi.

«Salyqtyq jáne kedendik ákimshilendirýdi jaqsartýda rezervter bar. Salyqtyq tekserýlerdiń nátıjeliligin arttyrýǵa, kedendik statıstıkadaǵy alshaqtyqtardy tómendetýge qatysty sapaly ózgeristerdi biz kórip otyrǵan joqpyz. Artyq tólem máseleleri de sheshilmegen. Bul rette ýákiletti memlekettik organ aýdıtke de, Májilis depýtattaryna da, Senat depýtattaryna da eskertýlerdi túsindire almady. Biraq ózin baspasózde aqtap shyǵýdy qajet dep tapty. Shamasy, máseleniń kúrdeliligine senip, oqyrmandar kásibı deńgeıde tolyq túsinbeıdi dep oılaǵan shyǵar. Biraq, ókinishke oraı, anyqtalǵan kemshilikter men buzýshylyqtardy jasyra almaısyń. Zańǵa sáıkes olardyń barlyǵy aýdıtorlyq dáleldermen rastalǵan»,- dedi komıtet tóraıymy.

Bul rette Natalıa Godýnova ashyqtyqty, esep berýdi arttyrý jáne memlekettiń bızneske kómek kórsetý tetikterin qaıta qaraý arqyly fıskaldyq saıasat reformasyn iske asyrý qajettigin basa aıtty.

«Atap aıtqanda, tıimsiz salyq jeńildikteriniń kúshin joıý jáne olardy júıeleý, kóleńkeli ekonomıkaǵa jáne salyq mindettemelerin oryndaýdan jaltarýǵa qarsy dáıekti kúres júrgizý arqyly salyq bazasyn keńeıtý jóninde is-sharalar qabyldaý kerek. Esep komıteti birneshe ret bıýdjettik táýekelderdi basqarý júıesin engizý jáne memlekettik qarjynyń uzaq merzimdi turaqtylyǵy qujatyn ázirleý máselesin qaraý qajettiligine nazar aýdarǵan bolatyn», - dedi ol.