Kedendik operatsııalardy jasaý ýaqyty qysqartylady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasyndaǵy kedendik retteý týraly» QR Kodeksine ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasynyń negizgi maqsattary kedendik operatsııalardy jasaý ýaqytyn qysqartýǵa, usynylatyn kedendik kórsetiletin qyzmetterdiń sapasyn qamtamasyz etýge, syrtqy saýdaǵa járdemdesýge, keden organdarynyń aqparattyq júıelerin odan ári damytýǵa negizdelgen.

Usynylyp otyrǵan ózgerister men tolyqtyrýlar, birinshi kezekte, memlekettik qyzmetterdi kórsetý merzimderin qysqartýǵa jáne olardy elektrondyq formatqa kóshirýge baǵyttalǵan. Bul taýarlardy synyptaý, qurastyrylmaǵan túrdegi taýarlardy synyptaý boıynsha aldyn ala sheshimder berý sııaqty kedendik kórsetiletin qyzmetterge qatysty.

Budan basqa, zııatkerlik menshik obektilerin kedendik tizilimderge engizý protsesi ońaılatylady.

Sonymen qatar, keden organdaryna taýarlardy synyptaý boıynsha qosymsha fýnktsııalar beriledi, birinshi kezekte, taýarlardy EAEO ishinde oryn aýystyrýǵa baılanysty.

Zań jobasynyń jekelegen túzetýleri redaktsııalyq dálsizdikterdi joıýǵa jáne EAEO Keden kodeksindegi ózgeristerge sáıkes keltirýge baǵyttalǵan.