Kedendik odaqtyń qurylýy ázirge baǵalardyń ózgerýine áser etken joq - Statıstıka agenttigi
STANA. Sáýirdiń 13-i. QazAqparat /Rýslan Ǵabbasov/ - Kedendik odaqtyń qurylýy ázirge baǵalardyń ózgerýine áser etken joq. Bul týraly búgin Astanada ótken brıfıngte QR Statıstıka agenttiginiń tóraǵasy Álıhan Smaıylov aıtty,
dep habarlaıdy QazAqparat.
Onyń aıtýynsha, ınflıatsııaǵa áser etetin azyq-túlik taýarlarynyń 80 paıyzy negizinen elimizde óndiriledi. Al qalǵan ımporttalatyn 20 paıyzy, negizinen TMD elderinen (90 paıyzy) tasymaldanady. Bul eldermen saýda bizde baj salyǵynsyz. Sondyqtan Keden odaǵyna kirý azyq-túlik taýarlary boıynsha baǵanyń ósýine yqpal etpeıdi. Osy oraıda ol KO aıasynda shekaradaǵy kedergiler joıylyp, taýar aınalymy arta túsetinin, bul óz kezeginde azyq-túlik baǵasyn aýyzdyqtaýǵa yqpal etetinin aıtty.
«Al azyq-túlik emes taýarlar boıynsha qandaı da bir ınflıatsııalyq táýekelder bolýy yqtımal. Alaıda, olar aıtarlyqtaı joǵary bolmaıdy»,-dedi Á. Smaıylov.
Agenttik basshysynyń sózine qaraǵanda, bul toptaǵy taýarlar boıynsha ártaraptanyp baǵyttalǵan dınamıka bolady, ıaǵnı keıbir taýarlarǵa baǵa joǵarylaıdy, al keıbireýlerine kerisinshe tómendeıdi. Sonymen birge ol azyq-túlik emes taýarlarynyń baǵasy halyqtyń satyp alý qabilettiligimen shekteletinin eskerip ótti.
