Kedendik odaqqa múshe memleketterge tehnıkalyq reglamentteýdiń biryńǵaı qaǵıdattary men tártibin engizý qajet
ASTANA. Qazannyń 20-y. QazAqparat /Aıdar Ospanalıev/ - Kedendik odaqqa múshe memleketter úshin tehnıkalyq reglamentteý salasynda biryńǵaı qaǵıdattar men tártip engizý basty mindetterdiń biri bolýy tıis.
Basqasha aıtqanda, bul salada úsh el birdeı baǵynatyn bir zań qajet. Bul týraly búgin jýrnalıstermen bolǵan brıfıngte Indýstrııa jáne jańa tehnologııalar mınıstrliginiń Tehnıkalyq retteý jáne metrologııa komıtetiniń tóraǵasy Ǵabıt Muhambetov málim etti.
Onyń sózine qaraǵanda, Reseı, Belarýs jáne Qazaqstan memleketteri óz aldyna jeke derbes el bolǵan soń bir-birinen birshama alystap ketti. Osyǵan qaraı qazir ár eldiń ár deńgeıdegi óziniń talaptary bar. «Sondyqtan bizdiń otandyq keıbir ónimderimiz Reseı men Belarýs elderiniń naryǵyna jete almaı otyr. Bizdiń taýarlarymyz atalǵan memleketterge barý úshin arnaıy sertıfıkattaý sharalarynan ótýi qajet. Onyń barlyǵy sol elderge jetkiziletin ónimniń baǵasyna áser etedi. Sóıtip, baǵasy qymbat taýar eshkimdi de qyzyqtyrmaıtyn bolady. Qazirgi tańda Reseıde mindetti túrde sertıfıkattaýǵa jatatyn ónim túrleri 2,5 myńdy quraıdy. Belarýsta ol 1,5 myń. Al Qazaqstanda bul kórsetkish 812-ni quraıdy. Osyǵan baılanysty qazir úsh memlekettiń de basshylary bizge osyǵan deıin erkin ekonomıkalyq keńistik aıasynda, al qazir Kedendik odaq aıasynda saýda salasyndaǵy kedergilerdiń barlyǵyn joıýdy tapsyryp otyr», - dedi komıtet tóraǵasy.
Onyń aıtýynsha, úsh eldiń ókilderi osy maqsatta arnaıy kelisim jasap, ony ratıfıkatsııalaǵan. Sóıtip, úsh elde birdeı sertıfıkattaýǵa jatatyn taýarlardyń tizimi jasalǵan. Oǵan sáıkes, úsh elde birdeı qoldanýǵa bolatyn sertıfıkat daıyndaldy. «Sonymen qatar Kedendik odaqtyń biryńǵaı reestrin jasadyq. Endi qazaqstandyq kásipker sertıfıkattaý organdaryna habarlasyp, biryńǵaı úlgidegi sertıfıkatty alady da emin-erkin Reseı men Belarýs memleketteriniń naryǵyna taýaryn tasymaldaı beredi. Búgingi tańda bul mindet tolyǵymen oryndaldy. Endi bizge Kedendik odaqqa múshe memleketter arasynda tehnıkalyq reglamentteýdiń biryńǵaı prıntsıpteri men tártibin engizý qajet»,- dedi Ǵ.Muhambetov.
