Kedendik odaqqa qatysty jurtshylyqtyń tıisti aqparattarmen tolyq qamtylmaýy baǵanyń ósýine sebep bolyp otyr

Búgin QR Parlamenti Májilisinde «Keden odaǵyndaǵy salyqty jáne kedendik ákimshilendirý týraly» taqyrypta ótken Úkimet saǵatynda depýtat Gúljan Qaraǵusova osylaı málim etti, dep habarlaıdy QazAqparat.

«Biregeı kedendik aýmaq jaǵdaıyndaǵy ishki problemalar jaıyna toqtalatyn bolsaq, azyq-túlik, avtokólik salasyna qatysty kóptegen saýda kompanııalary qazirgi kúni ózderiniń taýarlaryna qatysty 2010 jylǵy baǵa saıasaty belgilenbegenine shaǵymdanýda. Baǵanyń anyqtalmaýyna qatysty osy jaǵdaı kóptegen kompanııalardyń jekelegen taýar túrlerin jetkizýin toqtatýyna deıin ákep soǵady. Sonymen birge, Qazaqstanǵa ustalǵan, eski kólikterdi ákelýge qatysty kedendik baj problemasy halyq arasynda úlken abyrjýshylyq týdyrdy. Qazirgi kúni bundaı tasymal zańdy tulǵalarǵa ǵana qatysty bolǵandyqtan, bular kólik qunyn eki esege deıin arttyryp otyr. Sonymen birge, kólikke qatysty baǵanyń ósýi tek kedendik bajǵa ǵana qatysty bolmaǵany anyqtalýda. Buǵan jurtshylyqtyń qajetti aqparatpen tolyq qamtylmaı otyrǵany da sebep bolyp otyr», dedi G. Qaraǵusova.

Depýtattyń aıtýynsha, jeke tulǵalardyń avtokólikterdi ózderi tasymaldap alyp kelgendegi quny Biregeı Kedendik Kodeks kúshine engennen keıin, ıaǵnı 2010 jylǵy shildeniń 1-inen keıin retteletin bolady. «Al osy jóninde halyqtyń tolyq qulaǵdar bolmaǵanyn bilgen kásipkerler, zańdy tulǵalar baǵany qoldan kóterip otyr. Sondyqtan da, Keden odaǵy aıasynda der kezinde jurtshylyq úshin túsindirý jumystary júrgizilip, BAQ-ta qajetti aqparattar qamtylǵany shart», dedi depýtat.