Kedendik odaqqa qatysty memlekettik organdar da, jeke kásipkerlik te belgili bir beıimdelý kezeńin bastan ótkerýi tıis - Q. Toqaev
ASTANA. Naýryzdyń 9-y. QazAqparat /Qanat Mámetqazyuly/ - Kedendik odaqqa qatysty memlekettik organdar da, jeke kásipkerlik te belgili bir beıimdelý kezeńin bastan ótkerýi tıis. Bul týraly búgin QR Parlamenti Senatynda ótken «Óńir» depýtattyq tobynyń otyrysy barysynda Palata Tóraǵasy Qasym-Jomart Toqaev osylaı málim etti,
dep habarlaıdy QazAqparat.
«Depýtattardyń aldynda jańa qurylyp jatqan Kedendik odaqtyń maqsat, mindetterin túsindirý boıynsha úlken jumystar kútip tur. Halyq, ásirese kásipkerler osy yqpaldastyq birlestikke qatysty bizden mándi dálelder kútedi. Kedendik odaqtyń qyzmetine qatysty máselelerge elimizdiń kóptegen turǵyndary jiti nazar aýdarýda. Taza ekonomıkalyq máselelerden basqa, bunda saıası qyrlar da kórinis beredi. Degenmen, bundaǵy bir anyq nárse - memlekettik organdar da, jeke kásipkerlik te belgili bir beıimdelý kezeńin bastan ótkerýi tıis. Bul tolyq tabıǵı qubylys. Alaıda, depýtattar Kedendik odaqtyń negizgi mánin túsindirý boıynsha jumystaryn eshqashan kún tártibinen alyp tastamaýǵa tıisti», dedi Q. Toqaev.
Palata Tóraǵasynyń aıtýynsha, Kedendik odaq Qazaqstan Prezıdentiniń yqpaldastyq ıdeıasynyń naqty iske asyrylǵan kórinisi bolyp tabylady. «Yqpaldastyq negizinen bireýge ǵana paıda ákelip, qalǵanyna zalaldy bola almaıdy. Yqpaldastyq - ózara eseptesý men uzaqmerzimdi múddeler jemisi bolyp tabylady jáne bul barlyq tarapqa tıimdi qubylys retinde sanalady. Sondyqtan da Qazaqstan óziniń ekonomıkasyn damytý úshin jáne Elbasynyń strategııalyq tapsyrmalaryn júzege asyrý úshin asa jaǵymdy qadam jasady. Bul rettegi yqpaldastyq álemdik ekonomıkany damytýdyń magıstraldi baǵyty. Batys pen Shyǵys arasyndaǵy kóliktik kommýnıkatsııanyń ortasynan oryn tepken Qazaqstan eýrazııalyq iri memleket bola otyryp, árıne bundaı basty úderisten shet qala almaıdy», dedi Q. Toqaev.
