Kedendik Odaq qurylǵanmen qazaqstandyq qamtýdyń ózektiligi joıylmaıdy

ASTANA. 14 shilde. QazAqparat /Jasulan Amanbaıuly/ - Kedendik Odaq qurylsa da, qazaqstandyq qamtýdyń ózektiligi joıylmaıdy. Bul týraly búgin Astanada Bnews.kz portalynda ótken onlaın-konferentsııa barysynda «Jergilikti qamtýdy damytýdyń ulttyq agenttigi» AQ tóraǵasy Jandarbek Kákishev málim etti.

«Sońǵy kezderi Keden Odaǵy quryldy, endi qazaqstandyq qamtýdyń ózektiligi joıylady degen ártúrli áńgimeler kóbeıip ketti. Bul tipten qate pikir. Qazastanǵa jańa ónim shyǵarýǵa jáne jańa óndiristerdi uıymdastyrýǵa eshkim eshqashan tyıym sala almaıdy», - dedi ınternet paıdalanýshylardyń saýalyna jaýap qaıyrǵan J. Kákishev.

Onyń aıtýynsha, sońǵy bir-eki jyl ishinde jergilikti qamtýdy damytýdyń qazaqstandyq úlgisi paıda boldy. Jáne ol aldaǵy jyldary shet el mamandarynyń yqpaldastyǵy negizinde budan ári júıelenip, salalana bermek. Sebebi ol Qazaqstannyń ındýstrııalandyrý saıasatyna tikeleı baılanysty.

«Biz byltyr ÚIIDB aıasynda 152 nysandy iske qostyq. Bıyl 75 nysandy paıdalanýǵa berdik. Osylaısha, biz ındýstrııalandyrýdyń qazaqstandyq modelin qalyptastyrý jolyn salyp kelemiz», - dedi ol.

Degenmen ázirshe elde qazaqstandyq qamtýdyń eń kóp úlesin áli de bolsa óńdeýshi sala emes, shıkizattyq sektor alýda.