Kedendik odaq quramyndaǵy memleketterge baǵyttalǵan eksport ósti - Qarjy mınıstri
ASTANA. 26 qarasha. QazAqparat /Rýslan Ǵabbasov/ - Kedendik odaq quramyndaǵy memleketterge baǵyttalǵan qazaqstandyq eksport ósti. Bul týraly búgin Astanadaǵy onlaın-konferentsııa barysynda Qarjy mınıstri Bolat Jámishev aıtty.
Vedomstvo basshysynyń aıtýynsha, Kedendik odaqqa kirgennen beri Qazaqstannyń syrtqy saýdasyndaǵy qurylymy ózgere bastady. Bul óz kezeginde eksport kóleminiń artýyna yqpal etip otyr. Syrtqy saýdaǵa toqtalatyn bolsaq, úshinshi eldermen de (Kedendik odaqqa múshe emes elder) bolǵan saýda ósimi eksport esebinen iske asyryldy. «Taýar aınalymy negizinen eksport ósimi esebinen joǵarylap otyr. Eksport ósimi 47,2 paıyzdy qurady (bıylǵy 9 aıda). Negizinen bul mıneraldy shıkizat, munaı boıynsha jasalǵan saýdaǵa baılanysty»,-dedi B. Jámishev.
Onyń sózine qaraǵanda, Keden odaǵyna kirmeıtin úshinshi elderden keletin ımport 10,7 paıyzǵa tómendedi. «Atap aıtqanda, syrtqy saýda kólemi Reseımen jáne Belarýspen artty. Bıylǵy 9 aıdyń qorytyndysy boıynsha Reseıge baǵyttalǵan qazaqstandyq ónim eksporty 38 paıyzǵa ósti»,- dedi Jámishev. Osy oraıda mınıstr metaldan jasalǵan ónimder 2,4 esege, hımııalyq ónimder 1,4 esege, sondaı-aq toqyma salasy turyǵysynda eksporttyq ósim baıqalǵanyn jetkizdi. Al Reseıden óz kezeginde hımııalyq ónerkásip, aǵashtan jasalǵan ónimderdi, qurylys materıaldaryn, tutynýshylyq taýarlardyń ishinde aıaq kıim ımporttynyń úlesi artty.
