Kedendik odaq birlesken kásiporyndar úshin tıimdi bolmaq
RAL. Aqpannyń 24-i. QazAqparat /Eljan Eraly/ - Kedendik odaq birlesken kásiporyndar úshin tıimdi bolmaq. Bul týraly Oral qalasyndaǵy «Ekspo servıs» JShS dırektory Vasılıı Jeleznov málim etti,
dep habarlaıdy QazAqparat tilshisi.
Onyń aıtýynsha, qazir kóptegen kásipkerler Kedendik odaqtyń qurylýy bıznesti óristetýge keri áserin tıgizedi, reseılik jáne belarýstik taýarmen básekelesý úlken qıyndyq týdyrady dep qaýiptenedi. Al birlesken kásiporyndar úshin Kedendik odaqtyń zııanynan paıdasy molyraq. Kedendik kedergilerdiń joıylýy men salyqtyq tólemderdiń júıelenýi saýda-sattyq salasyndaǵy áriptestikti kúsheıtýge yqpal etip, tasymaldanatyn taýar kólemin ulǵaıtýǵa jol ashpaq. «Biz 2002 jyldan beri Reseıden plastmassa ydys-aıaq pen elektr eseptegishter ákelip satýmen aınalysamyz. Úshtik aýmaǵynda ortaq tarıf pen ortaq sertıfıkattyń engizilýin kásipkerlerge jasalǵan qamqorlyq dep bilemin. Menińshe, halyq, sonyń ishinde kásipkerler qaýymy Kedendik odaqtyń artyqshylyǵyn jete túsine qoıǵan joq. Biraq ýaqyt óte kele bári óz ornyna keledi dep senemin», deıdi ol.
