Kedendik odaq aıasyndaǵy yqpaldastyq keleshekte biregeı agrarlyq naryqty qurýǵa járdemdesedi - A. Kúrishbaev
STANA. Sáýirdiń 8-i. QazAqparat /Qanat Mámetqazyuly/ - Kedendik odaq aıasyndaǵy yqpaldastyq keleshekte biregeı agrarlyq naryqty qurýǵa járdemdesedi.
Búgin «Kedendik odaq elderiniń agroónerkásiptik keshenin damytýdy ǵylymmen qamtamasyz etý» atty halyqaralyq ǵylymı-tájirıbelik konferentsııa barysynda QR Aýyl sharýashylyǵy mınıstri Aqylbek Kúrishbaev osylaı málim etti, dep habarlaıdy QazAqparat.
«Meniń oıymsha, qazirgi kúni biregeı kedendik keńistikti qurý arqyly júzege asqan yqpaldastyq úderisteri aýyl sharýashylyǵy ónimderiniń saýdasyn jandandyryp qana qoımaı, keleshekte biregeı agrarlyq naryqty qurýǵa, agroónerkásiptik kesheni salasynda eńbek qatynastarynyń halyqaralyq bólinisi perspektıvalaryna jol ashady. Sarapshylardyń málimetterine súıensek, bizdiń elderimizdiń tutynatyn aýyl sharýashylyǵy taýarynyń ımporty sońǵy jyldary buryn bolmaǵan kórsetkishke kóterilip, 39 mlrd. dollardy qurap otyr. Sonymen bir mezgilde, biz sońǵy kezderi qarajatty ózindik agrarlyq óndirisimizdi damytýǵa jumsaýdyń ornyna, sheteldik fermerlerdiń qaltasyna quıyp jatqandaımyz. Árıne, ekonomıkanyń jahandaný jaǵdaıynda álemdik azyq-túlik naryǵynda básekelestikti nyǵaıtýǵa tek múmkindikterimizdi birlese jumyldyrǵanda ǵana qol jetkize alamyz. Sondyqtan da, biregeı agraralyq saıasatty júrgizý arqyly ǵana biz aýyl sharýashylyǵyn damytýda aıtarlyqtaı tıimdilikke qol jetkizetin bolamyz», dedi A. Kúrishbaev.
Sonymen birge, mınıstr bul baǵytta agrarlyq ǵylymnyń alar orny erekshe ekendigin atap ótti. Onyń aıtýynsha, dál osy agrarlyq ǵylym arqyly yqpaldastyq úderisteriniń ońtaıly jolyn qamtýǵa bolady.
«Biregeı Kedendik odaq bizdiń ǵalymdarymyz úshin qolda bar ǵylymı áleýetti tıimdi paıdalaný maqsatynda birige túsýge úlken múmkindikter týdyryp otyr. Sondyqtan da, salany ǵylymı qamtamasyz etýdiń biregeı júıesin qurý arqyly bizdiń agrarlyq ǵylymymyz belsendi yntymaqtastyq úshin biregeı múmkindikke ıe bolady. Bunyń ózi agroónerkásip keshenin jedel damytýǵa óz septigin tıgizedi», dedi A. Kúrishbaev.
