Kedendik odaq aıasynda memlekettik aktıvterdi baqylaýdy kúsheıtý qajet - QR Esep komıteti
sp; Sáýirdiń 7-si. QazAqparat /Arman Asqarov/ - Búgin Astanadaǵy Táýelsizdik saraıynda Joǵary qarjy baqylaý organdary Halyqaralyq uıymynyń (INTOSAI) mańyzdy ulttyq kórsetkishter jónindegi jumys tobynyń úshinshi otyrysy ótýde,
dep habarlaıdy QazAqparat.
Májiliste Qazaqstan ekonomıkasyn damytýdyń negizgi baǵyttary, elimizdiń basty ulttyq kórsetkishteri jáne álemdik ekonomıkadan oryn alǵan qarjylyq turaqsyzdyqtyń nátıjesinde jańa ulttyq kórsetkishterdi ázirleý máselesi talqylandy.
QR Esep komıtetiniń tóraǵasy Omarhan Óksikbaevtiń aıtýynsha, álemdik qarjy daǵdarysy sebep bolǵan kóptegen ekonomıkalyq qaýip-qaterlerden keıin jańadan qurylǵan Kedendik odaq aıasynda qarjy resýrstaryn baqylaý jumysyn erekshe nazarda ustaý qajet. «Qazaqstan, Reseı jáne Belarýs elderi arasyndaǵy ózara ekonomıkalyq kirigýdiń nátıjesinde jańa qaýip-qaterlerdiń týyndaýy zańdy. Osy oraıda memlekettik aktıvterdi baqylaý boıynsha bekitilgen talaptar kúsheıtilýi tıis. Bul maqsatqa tıimdi ǵylymı zertteý negizdemesi, tolyqqandy zańnama, kásibı mamandar men jańa aqparattyq tehnologııalardyń arqasynda jetýge bolady. Qazirgi kezde biz osy saladaǵy tıisti jumystardy atqaryp kelemiz», dedi O. Óksikbaev.
Erteńge deıin jalǵasatyn jumys tobynyń otyrysy barysynda ulttyq kórsetkishterdi qoldaný prıntsıpteri boıynsha júrgizilgen zertteý jumystary qaralyp, Reseıdiń esep palatasy ázirlegen TMD elderi aıasynda mańyzdy ulttyq kórsetkishterdiń qosalqy jobasynyń iske asyrylýy týraly esebi tyńdalady.
Sondaı-aq otyrys barysynda mańyzdy ulttyq kórsetkishter júıesin josparlaý jáne engizýge arnalǵan «Aq kitaptyń» qurylymy talqylanyp, jumys tobynyń quramyna jańa múshelerdi qabyldaý máselesi qarastyrylady.
Aıta keteıik, Joǵary qarjy baqylaý organdary Halyqaralyq uıymynyń (INTOSAI) mańyzdy ulttyq kórsetkishter jónindegi jumys tobynyń negizgi maqsaty - ulttyq jáne halyqaralyq deńgeıde ekonomıka, ekologııa jáne áleýmettik salalar boıynsha mańyzdy ulttyq kórsetkishterdi ázirlep, qoldanýǵa járdemdesý. Búgingi tańda RF Esep komıteti jumys tobynyń tóraǵasy bolyp tabylady. Toptyń quramyna álemniń 185-ten astam joǵary qarjy baqylaý organdary kiredi.
