Kedendik odaq arasynda zańsyz qarjy aınalymyna barynsha tosqaýyl qoıý kerek - A. Samaqova
Búgin Májiliste «Keden odaǵynyń kedendik shekarasy arqyly qolma-qol aqsha qarajatyn jáne (nemese) aqsha quraldaryn ótkizý kezinde qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly shartty ratıfıkatsııalaý týraly» zań jobasyn talqylaý barysynda depýtat Aıtkúl Samaqova osylaı málim etti.
Depýtattyń aıtýynsha, atalǵan zań jobasynyń ózektiligi zor. «Biz qoǵam úshin asa mańyzdy zań jobasyn der kezinde qarap, maquldap jatyrmyz. Óıtkeni, terrorızm búgingi tańda álemdi shýlatyp jatyr. Ókinishke qaraı bizdiń elimizge de kelip jetti. «Buny kim uıymdastyrady, olar aqshany qaıdan alady» degen jurtshylyq arasynda kóp túsinispeýshilikterdiń bar ekendigin de jasyryn emes. Sondyqtan da, Kedendik odaqtyń arasynda zańsyz aqshalaı qarajattarǵa barynsha tosqaýyl bolýy shart», - deıdi A. Samaqova. Onyń aıtýynsha, atalǵan zań jobasy osy máseleni qarastyrady.
