Kedendik baj salyǵy tólenbegen qyrǵyzstandyq kólikter tárkilenedi - Kedendik baqylaý komıteti
ASTANA. 25 sáýir. QazAqparat - Kedendik baj salyǵy tólenbegen qyrǵyzstandyq kólikter memlekettiń menshigine tárkilenedi.
Bul týraly búgin Astanada ótken baspasóz máslıhatynda QR Qarjy mınıstrligi Kedendik baqylaý komıteti tóraǵasynyń orynbasary Amanııaz Erjanov málim etti.
Onyń aıtýynsha, qazirgi kezde elimizde kedendik baj salyǵy tólenbegen qyrǵyzstandyq kólikter kóp.
«Zań boıynsha Qyrǵyzstannan ákelingen kólikterdi qazaqstandyq azamattar alty aı, al qyrǵyzstandyqtar bir jylǵa deıin mine alady. Atalǵan merzim ótkennen keıin, ol kólik quraldaryna kedendik baj salyǵy tólenýi tıis. Biraq bizdiń azamattar oǵan qaramaı, júre beretin kórinedi. Mamyrdyń 20-synan bastap ondaı mashınalardy anyqtaıtyn bolamyz. Zańǵa sáıkes, biz olardy tárkileı alamyz», - deıdi A.Erjanov.
Búgingi tańda Qazaqstan-Qyrǵyzstan shekarasynda tirkeýden ótetin kólik quraldarynyń deni tranzıttik maqsatpen Reseıge ótip jatady. Sol sebepti elimizde qyrǵyzstandyq nómirmen júrgen kólikterdiń naqty sanyn anyqtaý qıyn bolyp tur.
