Kedendik baqylaý komıtetiniń tóraǵasy Q.Kárbozov qazaqstandyq kedenshilerdi kásibı merekelerimen quttyqtady
ASTANA. 11 jeltoqsan. QazAqparat /Gúlmıra Álıakparova/ - Erteń, 12 jeltoqsan - Qazaqstan Respýblıkasynyń Kedendik qyzmeti qurylǵan kún.
Dál osy kúni 1991 jyly QR Prezıdentiniń Jarlyǵymen QR Keden qyzmeti quryldy. Al 1992 jylǵy 28 aqpandaǵy «Kedendik organdar qurý týraly» №35-inshi buıryqpen 12 kedendik qosynymen 6 keden ortalyǵy quryldy.
Kedendik organnyń qurylýy respýblıkamyzdyń egemendigin alýymen tuspa-tus keldi. Sodan beri el táýelsizdigimen jasasyp, memlekettiń múddesin qorǵaý isinde, onyń ekonomıkalyq jáne ulttyq qaýipsizdigin qamtamasyz etýde abyroıly qyzmet atqaryp keledi. Buǵan deıin birneshe ret reformalanǵan kedendik organ bıyl 19 jyldyq mereıtoıyn atap ótýde.Qazaqstandyq kedenshilerdi kásibı merekelerimen jáne alda kele jatqan Táýelsizdik kúnimen QR Qarjy mınıstrligi Kedendik baqylaý komıtetiniń tóraǵasy Qozy-Kórpesh Kárbozov quttyqtady.
«QR Keden qyzmeti óziniń 19 jylǵy tarıhynda jetilgen, turaqty, múmkindigi mol, qoǵam ómirinde mańyzdy rol atqaratyn, sondaı-aq eldegi ekonomıkalyq protsessterge yqpal etetin memlekettik organ bolyp qalyptasty. Qazaqstan kedeni yntymaqtastyq elderdiń keden qyzmetteri arasynda - kedendik jańa tehnıkalyq baqylaý quraldaryn engizip, qoldana bastaǵan alǵashqylardyń biri. Qazaqstandyq kedenniń jetistikteriniń taǵy biri - Kedendik baqylaý komıteti bazasynda Dúnıejúzilik keden uıymynyń Óńirlik oqý ortalyǵynyń ashylýy. Bul nátıjeler - búkil ujymnyń, árbir keden qyzmetkerleriniń jeke dara eńbeginiń jemisi. Sizderdiń shynaıy da adal eńbekterińiz úshin alǵys aıta otyryp, zor densaýlyq, tabys, Qazaqstan Respýblıkasynyń ekonomıkalyq múddesin qorǵaýda aldaǵy eńbekterińizge sáttilik tileımin», - delingen quttyqtaýda.
