Kedendik ákimshilendirýdi kúsheıtý esebinen bıýdjetke qosymsha 150 mlrd teńge túsedi - Jamaýbaev

NUR-SULTAN. QazAqparat – Kedendik ákimshilendirýdi kúsheıtý esebinen respýblıkalyq bıýdjetke qosymsha shamamen 150 mlrd teńge túsedi. Bul týraly Úkimet otyrysynda Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Keden salasyn tártipke keltirý maqsatynda jedel jáne júıeli is-sharalar qabyldanýda. Onyń ishinde ásirese tsıfrlandyrý basym baǵyt bolady. Jedel is-sharalar bóliginde deklaratsııalardy baqylaý jáne shyǵarý jónindegi kedendik fýnktsııalar ortalyqtandyryldy. 9 ýákiletti ekonomıkalyq operatorǵa jáne basqa da iri ımporttaýshylarǵa qatysty tekserýler aıaqtalyp qaldy. Shekaradaǵy elektrondyq kezek júıesin jetildirý boıynsha jumystar júrgizilýde. Ýákiletti ekonomıkalyq operatorlarǵa qoıylatyn biliktilik talaptary zańnamalyq túrde kúsheıtiletin bolady», - dedi mınıstr.

Onyń atap ótýinshe, júıeli sharalar aıasynda ASTANA-1 jáne E-tereze aqparattyq júıeleri jetildirilýde. Táýekelderdi basqarý júıesine sýbektige baǵdarlanǵan tásil jáne derekterdi ıntellektýaldy taldaý engiziledi. Elektrondyq shot-faktýralar negizinde taýarlardy qadaǵalaý júıesin odan ári damytý júrgizilip jatyr.

«Bul ımporttan bastap tutynýshyǵa deıingi barlyq ótkizý tizbegi boıynsha salyqtyq baqylaýǵa múmkindik beredi. Budan basqa QHR-men kedendik statıstıkanyń alshaqtyǵyn tómendetý, sondaı-aq kedendik ınfraqurylymdy jańǵyrtý boıynsha keshendi is-sharalar qabyldanyp jatyr. Jalpy, bıylǵy jyly kedendik ákimshilendirýdi kúsheıtý esebinen respýblıkalyq bıýdjetke qosymsha shamamen 150 mlrd teńge túsedi dep josparlanýda. Bul jumys jete baqylaýǵa alynǵan», - dedi Erulan Jamaýbaev.