Keden isin tsıfrlandyrý: Qazaqstan men Koreıa tájirıbe almasady
ASTANA.KAZINFORM — 1 sáýirde Seýl qalasynda ótken «Jahandyq saýda ekojúıesin jetildirý» taqyrybyndaǵy saýdaǵa járdemdesý saıasaty jónindegi óńirlik semınar aıasynda Qazaqstan Respýblıkasy Qarjy mınıstrliginiń Memlekettik kirister komıteti Tóraǵasynyń orynbasary Qaırat Jumaǵulov pen Koreıa Keden qyzmetiniń Komıssary Men Gý Lı arasynda ekijaqty kezdesý ótti. Bul týraly komıtettiń baspasóz qyzmeti málim etti.
Kezdesýdiń negizgi maqsaty Qazaqstan men Koreıa Respýblıkasy keden qyzmetteri arasyndaǵy yntymaqtastyqtyń aǵymdaǵy jaı-kúıi men ony odan ári damytý perspektıvalaryn talqylaý boldy.
— Kelissóz barysynda qazaqstandyq tarap koreı áriptesterine halyqaralyq semınardy joǵary deńgeıde uıymdastyrǵany úshin alǵysyn bildirip, mundaı alańdardyń kásibı dıalogty nyǵaıtý, tájirıbe almasý jáne halyqaralyq saýdany jeńildetý salasynda birlesken sheshimder ázirleý úshin mańyzdylyǵyn atap ótti, — delingen habarlamada.
Óz kezeginde koreı tarapy Qazaqstannyń Eýrazııa óńirindegi Azııa men Eýropany baılanystyratyn negizgi kólik-logıstıkalyq hab retindegi strategııalyq rólin atap ótti.
Sondaı-aq Koreıa Respýblıkasynyń Qazaqstannyń saýda-ekonomıkalyq jáne keden salalaryndaǵy mańyzdy seriktesteriniń biri ekeni aıtyldy. Osyǵan baılanysty taraptar turaqty dıalogty qoldaýǵa jáne ózara qyzyǵýshylyq týdyratyn baǵyttar boıynsha praktıkalyq ózara is-qımyldy keńeıtýge múddeliligin rastady.
Kezdesý barysynda kedendik ákimshilendirýdi tsıfrlandyrý jáne kedendik rásimderdi jeńildetýge baǵyttalǵan zamanaýı aqparattyq tehnologııalardy engizý máselelerine erekshe nazar aýdaryldy.
Kezdesý qorytyndysy boıynsha taraptar yntymaqtastyqty odan ári nyǵaıtý, onyń ishinde tájirıbe almasý jáne tsıfrlandyrý, sondaı-aq kedendik úderisterdiń tıimdiligin arttyrý baǵytyndaǵy birlesken bastamalardy damytý jóninde kelisimge keldi.
Ótken kelissózder taraptardyń qazaqstan-koreı yntymaqtastyǵyn tereńdetýge ózara múddeliligin rastady jáne zamanaýı, tehnologııalyq ári tıimdi keden júıesin damytý jolyndaǵy mańyzdy qadam boldy.
Buǵan deıin Qazaqstan men Koreıa atom energetıkasy jobalaryn birlesip damytýǵa nıetti ekenin jazdyq.
