Keden salasyndaǵy blokcheın krıptovalıýtany qoldanýǵa jol ashady - Dastan Qojabekov
«Menińshe, atalǵan bastama «Smart contract», ıaǵnı «aqyldy kontrakt» úlgisinde júzege asady. Dál osy «aqyldy kontrakt» júıesi blokcheınniń negizinde jumys isteıdi. Oǵan sáıkes, taýar satyp alýshy men jetkizýshi arasyndaǵy esep aırysý, al keden organdary qatysqanda jaǵdaıda úshjaqty aıyrbas tek tsıfrlyq valıýtamen ǵana júrgiziledi. Tsıfrlyq valıýta ol - krıptovalıýta. Bul degenimiz, kedendik operatsııalar kezinde blokcheın tehnologııasyn, sonyń ishinde «Smart contract» júıesin qoldansa, tsıfrlyq aqshadan basqa eshqandaı aıyrbas quraly júrmeıdi. Biraq dál qazir bizde blokcheın men krıptovalıýtaǵa qatysty zańnama joq», - dedi D.Qojabekov.
Onyń aıtýynsha, «Smart contract» júıesi kezinde «aqyldy kelisimder» bazasy jasalady. Ondaıda adam portalǵa kiredi de, belgili bir kelisimdi tańdaıdy. Kontragent ony birden oryndaýǵa kirisedi. «Bul jerde kontragentpen betpe-bet kezdesýdiń qajeti joq. Olar bir-birimen tanyspasa da bolady. Elektrondy júıe taýar men qyzmetterdi jetkizýshi kompanııany ózi taýyp beredi. Daý-damaılar, aıyppul salý, sot jáne arbıtraj - bári-bári avtomatty túrde júredi. Máselen, bir bıznesmen Qytaıdan qural-jabdyqtardy ımporttasa, júkti shekaradan ótkizgen boıda kedendik organdarǵa tısti tólemderdi avtomatty túrde aýdara alady. Osylaısha, júk tasymaly jedel júre bastaıdy», - dep atap kórsetti sarapshy.
Aıta keteıik, bıylǵy Joldaýda QR Prezıdenti júk tasymaly damytý máselesine basa nazar aýdaryp, kedendik rásimdeý júıesine blokcheın tehnologııalaryn engizýde tapsyrdy.
«Júk qozǵalysyn onlaın rejıminde baqylap, olardyń kedergisiz tasymaldanýy úshin jáne kedendik operatsııalardy jeńildetý maqsatymen blokcheın sııaqty tsıfrlyq tehnologııalardyń aýqymdy túrde engizilýin qamtamasyz etý qajet», - delingen Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynda.
