Keden, organ qyzmetkerleri bar 30-ǵa tarta kúdikti ustaldy - Bas prokýratýra
ASTANA. QazAqparat - Keden salasynda júrgizilgen arnaıy operatsııalar barysynda 29 kúdikti ustaldy, dep habarlaıdy QazAqparat QR Bas prokýratýrasynyń baspasóz qyzmetine silteme jasap.
«15-16 aqpan kúnderi QR Bas prokýratýrasynyń úılestirýimen Ulttyq qaýipsizdik komıteti jáne Sybaılas jemqorlyqqa qarsy is-qımyl ulttyq bıýrosy keden salasyndaǵy quqyqbuzýshylyqtardyń jolyn kesý, uıymdasqan qylmystyq toptarǵa qarsy kúresti kúsheıtý, Almaty, Jambyl, Ońtústik Qazaqstan oblystary men Almaty qalasynda bir ýaqytta asa aýqymdy arnaıy operatsııa júrgizdi», - delingen habarlamada.
Operatsııa barysynda 29 kúdikti, onyń 16-sy Almaty, Jambyl oblystary men Almaty qalasynda, 13-i Ońtústik Qazaqstan oblysynda ustaldy. Olardyń arasynda keden jáne quqyq qorǵaý organdarynyń laýazymdy tulǵalary, brokerler, deldaldar, qylmys áleminiń ókilderi, sondaı-aq Qyrǵyzstannyń 2 azamaty bar.
Jedel tergeý sharalary jalǵasyp jatyr.
