Keden onlaın tapsyrysyńyzdy qandaı jaǵdaılarda ótkizbeı qoıady — Memkiris jaýaby
ASTANA. KAZINFORM — Memlekettik kirister komıteti Ádisteme departamenti Keden ádistemesi basqarmasynyń bas sarapshysy Marhabat Omarova vedomstvonyń onlaın baspasóz máslıhatynda shetelden onlaın tapsyrys arqyly alǵyzǵan taýarlardy keden qyzmetkerleri qandaı jaǵdaıda ótkizbeı qoıýǵa quqyly ekenin aıtty.
— Kez kelgen taýar túrli sebeptermen kedennen ótpeı qalýy múmkin. Ol sebepterdiń ishinde negizgileri táýekel ındıkatorlary. Mysaly, dron alyp ótpek bolsańyz, qaýipti bıologııalyq belsendi qospalar bolsa, keden organdary ótkizbeı tastaıdy. Taýardyń baǵasy aqylǵa qonymsyz tómen bolsa da táýekel ındıkatory iske qosylady. Mysaly, naryqtaǵy baǵasy qymbat telefondy 1 eýroǵa satyp aldyńyz deıik. Shynymen onyń baǵasy 1 eýro bolǵanyn qujatpen dáleldeýińiz kerek bolady, — dedi ol.
Komıtet sarapshysy tapsyrys berýshiler kedende shekteý qoıylǵan taýardyń táýekel ındıkatoryna jatpaıtynyn dáleldeý quqyǵy bar ekenin aıtady.
— Bir ózińizge dep 20-30 telefonǵa, 20-30 jeıdege tapsyrys berseńiz de keden organdarynan suraq týyndaýy múmkin. Óıtkeni kommertsııalyq qyzmetke arnalmaǵan tapsyrys bolǵandyqtan bir adamǵa bir taýardyń 20-30 danasy qajet emes ekeni qısyndy. Qalaı bolǵanda da tapsyrys berýshi taýardyń baǵasyn, alǵyzý maqsatyn dáleldeýge quqyly, — dedi Marhabat Omarova.
Eske salsaq, Májilis depýtaty Marhabat Jaıymbetov onlaın saýdanyń damýy elimizge ekologııalyq zalal keltirip jatyr dep másele kóterdi.
