Keden odaǵynyń syrtqy jáne ózara saýda-sattyǵynyń yqpaldasqan aqparattyq júıesin qurý týraly tujyrymdama ázirlendi - Máskeý
MÁSKEÝ. Qazannyń 15-i. QazAqparat /Narymbek Ysmaǵulov/ - Máskeýde Keden odaǵy Komıssııasy músheleriniń jıyrmasynshy otyrysynda birqatar halyqaralyq kelisimsharttardyń jobalary men Keden odaǵynyń joǵary organynyń sheshimderi talqylandy.
Keden odaǵy Komıssııasynyń baspasóz qyzmetinen habarlaǵandaı, kezdesýge qatysýshylar EýrAzEQ aıasyndaǵy Keden odaǵy elderi kedendik qyzmet ókildikteriniń máseleleri jónindegi kedendik isterdegi yntymaqtastyq jáne ózara kómekteri týraly kelisimniń jobasyn qarady. Bul joba Kedendik odaq aýmaǵyndaǵy kedendik qyzmetterdiń ózara is-qımyldaryn qamtamasyz etýge, sondaı-aq olardyń ózara is-qımyldarynyń quqyqtyq negizdemelerin jasaýǵa baǵyttalǵan.
Jınalǵan sarapshylar sondaı-aq Keden odaǵynyń syrtqy shekarasyndaǵy kóliktik baqylaýdy júzege asyrý týraly kelisimniń jobasyn, Ótpeli kezeńniń barysynda arnaýly qorǵanys, antıdempıngilik jáne ótemaqylyq sharalardy qoldanýdyń reti týraly kelisimniń jobasyn maquldady.
Komıssııa músheleri sondaı-aq Keden odaǵynyń syrtqy jáne ózara saýda-sattyǵynyń yqpaldasqan aqparattyq júıesin qurý týraly tujyrymdamany da maquldady.
Keden odaǵy elderi úkimet basshylarynyń qazannyń 15-inde ótetin kezdesýine ázirlik aıasynda, Komıssııa músheleri EýrAzEQ-tyń Birtutas ekonomıkalyq keńistigin qurý jónindegi kelisimderdiń daıyndalý barysyn da taldap shyqty.
