Keden odaǵynyń komıssııasy endi Eýrazııalyq ekonomıkalyq komıssııasyna aınalady - Qazaqstandaǵy Reseı Elshisi
MATY. 15 qarasha. QazAqparat /Erlik Erjanuly/ - «Biryńǵaı ekonomıkalyq keńistik ıdeıasyn sarapshylar qazir qalypty jaǵdaıda qabyldaıdy. Ol Keden odaǵy qurylǵan kezdegideı jarqyn emes sııaqty». Bul búgin Almatyda ótip jatqan «Biryńǵaı ekonomıkalyq keńistikti qalyptastyrý: jaǵdaıy, máseleleri jáne keleshegi» dep atalatyn ǵylymı-tájirıbelik konferentsııada aıtyldy.
Reseıdiń Qazaqstandaǵy Tótenshe jáne Ókiletti Elshisi Mıhaıl Bocharnıkovtyń aıtýynsha, jurtshylyq nazary qazir Biryńǵaı ekonomıkalyq keńistikke emes, bizdiń elderimizdiń yqpaldastyq dárejesine aýyp ketken sııaqty. Reseıde de, Qazaqstanda ta kóbine-kóp bul Keńes odaǵyna qaıtyp kelýdiń joly emes pe, ol egemendikten aıyrmaı ma degen saýaldar jıi qoıylýda. Buǵan Qazaqstan, Belarýs, Reseı elderiniń memleket basshylary óz kezeginde jaýap bergen bolatyn.
«Eýrazııalyq ekonomıkalyq odaq ıdeıasy keleshektiń isi. Bizdiń yqpaldastyqta jańa element paıda boldy. Ol júıelilik jáne kezeńdik. Buryn Keden odaǵy qurylǵan kezde qaıda bet alǵanymyz asa aıqyn bolmady. Endi bul Eýrazııalyq ekonomıkalyq odaqtyń birinshi kezeńi, al Biryńǵaı ekonomıkalyq keńistik ekinshi kezeńi ekeni qaǵaz júzinde de belgili bop qaldy», - deıdi M. Bocharnıkov.
