Keden odaǵy yqpaldastyq birlestik retinde tolyq qalyptasty - QR Premer-Mınıstri
MINSK. 16 naýryz. QazAqparat /Aıtýar Mamlın/ - Keshe Mınskide ótken EýrAzEQ Memleketaralyq keńesi men Odaqtas memleketterdiń Mınıstrler keńesi májilisteriniń qorytyndysy boıynsha Qazaqstan,
Belarýs jáne Reseı premerleriniń qatysýymen birlesken baspasóz máslıhaty boldy.
Jýrnalısterdiń saýaldaryna jaýap bergen Qazaqstan Premer-Mınıstri Kárim Másimov, qol jetkizilgen kelisimderge sáıkes kedendik baqylaýdy syrtqy kontýrǵa shyǵarýǵa kedergi bolýy múmkin barlyq máselelerdiń túıini sheshilgenin atap kórsetti.
«Kelisimderge sáıkes, kedendik baqylaýdyń 2011 jyldyń 1 shildesinen bastap syrtqy kontýrǵa shyǵarylatynyn málim etkim keledi. Tólqujattyq baqylaý turǵysynda - ol árıne saqtalady, biraq biz búgin sondaı-aq jalpy tólqujattyq jáne vızalyq máselelerdi de úılestiretin jumys tobyn qurý týraly sheshim qabyldadyq. Keden odaǵynyń yqpaldastyq birlestik retinde tolyq qalyptasqanyn taǵy da aıtyp ótkim keledi. Jáne bul odaq bizdiń ekonomıkalarymyz daǵdarystan endi shyǵa bastaǵan kezeńde, ótken 2010 jyl boıy óz múmkindigin taǵy da kórsete bildi», - dep atap kórsetti K.Másimov óz sózinde.
