Keden odaǵy boıynsha taýarlardyń qunyn deklaratsııalaý tártibi týraly kelisim maquldandy - Májilis
ANA. Aqpannyń 24-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Keden odaǵynyń kedendik shekarasy arqyly ótkiziletin taýarlardyń kedendik qunyn deklaratsııalaý tártibi týraly kelisimdi ratıfıkatsııalaý týraly» zań jobasyn maquldady.
Endi qujat Parlament Senatyna jiberiledi, dep habarlaıdy QazAqparat.
Keden odaǵy aıasyndaǵy osy kelisimniń maqsaty odaqqa qatysýshy memleketterdiń biryńǵaı keden aýmaǵyna ákelinetin taýarlardyń jáne osy aýmaqtan áketiletin taýarlardyń kedendik qunyn deklaratsııalaý tártibiniń negizgi erejelerin aıqyndaý bolyp tabylady. Soǵan sáıkes qatysýshy memleketterdiń kedendik quqyqtyq qatynastardy retteıtin halyqaralyq sharttary ázirlenetin bolady.
Bul rette Keden odaǵyna qatysýshy memleketterdiń biryńǵaı keden aýmaǵynan áketiletin taýarlardyń kedendik qunyn deklaratsııalaý árbir memlekettiń zańnamasyna sáıkes júrgiziletin bolady. Bundaı deklaratsııalaý jumysy jazbasha, elektrondy jáne halyqaralyq sharttarmen aıqyndalǵan ózge nysandar boıynsha júrgiziledi.
Al kedendik qun deklaratsııasy kedendik deklaratsııanyń ajyramas bóligi bolyp tabylady.
Kelisimge Qazaqstan, Belarýs jáne Reseı Úkimetteri arasynda 2008 jylǵy jeltoqsannyń 12-sinde Máskeý qalasynda qol qoıylǵan.
