Keden odaǵy aıasyndaǵy tarıfterdiń kóterilýi Frantsııanyń taýar eksportyna áser etýi múmkin - Frantsııa Elshisi
/em> /Qanat Mámetqazyuly/ - Keden odaǵy aıasyndaǵy tarıfterdiń kóterilýi Frantsııanyń Qazaqstanǵa qatysty taýar eksportyna áser etýi múmkin.
Búgin Parlament Senatynda «Qazaqstannyń Eýropa elderimen saýda-ekonomıkalyq yntymaqtastyǵynyń perspektıvalary» atty taqyrybynda ótken konferentsııa barysynda Qazaqstan Respýblıkasyndaǵy Frantsýz Respýblıkasynyń Tótenshe jáne Ókiletti elshisi Jan Sharl Bertone myrza osylaı málim etti, dep habarlaıdy QazAqparat.
«Qazaqstan men Frantsııa arasyndaǵy ekonomıkalyq jáne saýda qarym- qatynastary taýar aınalymynyń ósýimen, damýdyń zor áleýetimen sıpattalady. 2009 jyly elder arasyndaǵy taýar aınalymynyń kólemi 2,75 mlrd eýrony qurady. Bul 2008 jylmen salystyrǵanda 8 paıyzǵa artyq kórsetkish. Qazaqstan men Frantsııanyń saýda aınalymy 2010 jyly 3,8 mlrd. eýro shamasynda baǵalanady. Ekonomıkalyq daǵdarystyń saldary ótken jyldyń segiz aıynda taýar aınalymynyń birshama tómendeýine jol berdi. Jalpy, mundaı kórsetkishter negizine súıensek, eki memlekettiń arasyndaǵy taýar aınalymyn ornyqty túrde arttyrýǵa bolatynyn kórsetedi», dedi Elshi.
Sonymen birge, Elshi Kedendik odaqtyń qurylýyna oraı Qazaqstanǵa Frantsııa ınvestıtsııasynyń aýqymy artýy múmkindigin alǵa tartty. «Frantsýzdyq kásiporyndar Qazaqstan aýmaǵyn Reseı naryǵyna qaraı taýar óndirip, eksporttaıtyn baza retinde paıdalanýy úshin yntaly bolýy da múmkin. Biraq, ekinshi bir jaǵynan Kedendik odaqtyń qurylýyna baılanysty kedendik tarıfterdiń kóterilý múmkindigi frantsýzdyq taýar eksportynyń kólemine áser etýi múmkin», dedi J. Sh. Bertone. Onyń aıtýynsha, 2007 jyly Frantsııa ınvestıtsııa salymy jaǵynan Qazaqstandaǵy sheteldik ınvestorlar arasynda besinshi oryndy alǵan. Onyń sol kezdegi ınvestıtsııasynyń kólemi 1,3 mlrd. eýrony quraǵan bolsa, byltyr 2009 jyldyń qańtar-qyrkúıek aılaryndaǵy frantsýzdyq ınvestıtsııa aǵyny 1,1 mlrd. eýroǵa jetipti.
Al Senat komıtetiniń tóraıymy Nurlyǵaıym Joldasbaevanyń aıtýynsha, Eýropalyq Odaq elderi arasynda Frantsııa qazaqstandyq eksporttyń 7,5 paıyzyn tutynady. Al Qazaqstanǵa EO ımportynyń arasynda Frantsııanyń úlesi 7 paıyzdy qurap otyr.
