Keden odaǵy aıasynda shekaranyń ashyqtyǵynan týyndaýy múmkin máselelerge basa nazar aýdarý kerek - Ǵ. Qasymov

ASTANA. Jeltoqsannyń 8-i. QazAqparat /Qanat Mámetqazyuly/ - Keden odaǵy aıasynda shekaranyń ashyqtyǵynan týyndaýy múmkin máselelerge basa nazar aýdarý kerek. Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń otyrysyndaǵy «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda senator Ǵanı Qasymov osylaı málim etti,

dep habarlaıdy QazAqparat.

«Terrorızmge qarsy is-qımyl jónindegi zań jobasy eń aldymen lańkestiktiń aldyn alýǵa baǵyttalyp, tolyǵymen ulttyq múddege jaýap berýi shart. Sondyqtan da, zań jobasy arqyly syrttan keletin qaýipterge qarsy turýǵa basymdyq berilýi tıis. Máselen, biz Keden odaǵyn quryp jatyrmyz. Odaq aıasynda ekonomıkalyq shekaramyzdan bólek, basqa da áreketterge - kapıtaldardyń aǵylýyna, eńbek kúshiniń almasýyna jáne basqa sharalarǵa jol ashylatyny belgili. Al búgingi Reseıde eki kúnniń birinde lańkestik áreketter qylań beretini jasyryn emes. Endeshe, Kedendik odaq aıasynda myqty shekara bolmasa, onda jańaǵydaı aýysýlardyń saldary qandaı bolatynyn túsiný de qıyn emes», dedi senator. Onyń aıtýynsha, Reseımen arada 67 kedendik beket bar. Bulardyń barlyǵynda shekaralyq qyraǵylyq qamtylmaǵan.

«Biz shyndyqqa tike  qaraýymyz kerek. Kórshiles qyrǵyz eli DSU-ǵa kirdi, shekarasyn aıqara ashty, sapyrylys bastalyp ketti. Sol sekildi Qazaqstan úshin shekara máselesi ózektiligin áli joıǵan joq. Sondyqtan da, syrtqy qaýipterdiń elimizge aǵylýynyń aldyn alý asa qajet», dedi Ǵ. Qasymov.