Keden odaǵy aıasynda Qazaqstannyń et ónimderin Reseıge eksporttaýǵa jaqsy múmkindik týady - Úkimet basshysy
A. Jeltoqsannyń 14-i. QazAqparat /Qanat Mámetqazyuly/ -Keden odaǵy aıasynda Qazaqstannyń et ónimderin Reseıge eksporttaýǵa jaqsy múmkindik týady. Bul týraly búgin Úkimette agroónerkásiptik keshendi damytýǵa arnalǵan respýblıkalyq keńeste Premer-Mınıstr Kárim Másimov málim etti,
dep habarlaıdy QazAqparat.
«Kedendik odaq aıasynda Qazaqstanǵa qandaı múmkindikter ashylady?! Máselen, men keńeske daıyndyq barysynda biraz sandyq málimetterdi qarap shyqtym. 1913 jyly Reseı aýmaǵynda 40 mln. -ǵa jýyq iri qara mal bolypty. Revolıýtsııa, azamat soǵysynan keıin 1940-jyldary mal basy 40 mln.-ǵa qaıta kóteriledi.1982 jyly sol kezdegi RSFSR aýmaǵynda 115 mln. mal basy bolǵan eken. Al búgingi kúngi málimetterdi qarap tań qaldym - Reseıde mal basy 9 mln. ǵana. Reseı jylyna 3 mlrd. dollardyń etin, negizinen Latyn Amerıkasynan alyp tutynady eken. Mine - Kedendik odaq aıasyndaǵy bizdiń naryq», dedi Premer-Mınıstr. Sonymen birge, dál osy baǵytqa naqty nazar aýdaryp, kórshiles elderdiń naryǵyna ený qajettigin aıtqan K. Másimov, bul máselede reseılik áriptesterimen áńgime bolǵandyǵyn, ol taraptan tek ónimniń sanıtarlyq normaǵa sáıkes bolýy talap etiletindigin jetkizdi.
«Sharýashylyqtardy irilendirý, veterınarlyq baqylaýlar máselelerine arnalǵan jumys jalǵasý qajet. Sanıtarlyq norma durys bolmasa, sertıfıkat ta bolmaıdy, bizden eshkim de eshteńe satyp almaıdy. Eń bastysy naryqty jaýlap alý kerek», dedi Úkimet basshysy.
