Keden qyzmetkerleriniń 80 paıyzdan astamy quqyq qorǵaý organy qyzmetkerleriniń qatarynan shyǵarylady

Bul týraly búgin Qarjy mınıstrliginiń alqa májilisinde vedomstvoǵa qarasty Kedendik baqylaý komıtetiniń tóraǵasy Serik Baımaǵambetov málim etti.

Onyń sózinshe, Kedendik baqylaý komıtetiniń bólimsheleri atqaratyn jumystar saraptalyp, nátıjesinde ótken jyldyń jeltoqsan aıynda arnaıy qaýly jobasy daıyndalyp, Úkimettiń qaraýyna engizildi. «Onda keden organdarynyń 83 paıyzyn quqyq qorǵaý organy qyzmetkerleriniń qatarynan alyp tastaý máselesi qaralǵan. Eger qaýly kúshine enetin bolsa keden salasynyń 17 paıyzy ǵana, attestatsııadan ótken qyzmetker bolyp qalady. Bul degenińiz 1 myńǵa da jetpeıtin qyzmetkerler»,-dedi S.Baımaǵambetov.

Komıtet tóraǵasynyń aıtýynsha, keden salasy qyzmetkerleriniń 17 paıyzynan ózgeleri quqyq qorǵaý organynyń qyzmetkeri bolyp eseptelmeıdi. «Quqyq qorǵaý organy qyzmetkerleriniń qatarynda sanalatyn azamattardy attestatsııadan ótkizý máselesi qarastyrylýda. Sonymen qatar Memleket basshysynyń tapsyrmasymen keden salasynyń  quqyq qorǵaý organdarynda  jumys isteıtin azamattardyń mártebeleri belgilenedi»,-dedi ol.