Keden qyzmetkerlerine qatysty qozǵalǵan isterdiń 75 paıyzyn ózimiz anyqtaımyz - Kedendik baqylaý komıtetiniń tóraǵasy
ALMATY. Qyrkúıektiń 16-sy. QazAqparat /Erlik Erjanuly/ - "Keden qyzmetine degen halyqtyń senimin ornyqtyrý úshin sybaılastyq pen jemqorlyqqa qarsy kúres bizde birinshi kezekke shyǵarylǵan".
Búgin Almatyda ótip jatqan Qazaqstan-Qytaı yntymaqtastyq jónindegi komıtetiniń ótkizý pýnkteri arasyndaǵy jáne keden isi salasynda yntymaqtastyq jónindegi kishi komıtetiniń 6-shy otyrysynda osylaı aıtyldy.
"Kedenshilerge qoıylatyn talap qataıtylyp, jemqorlyqpen kúres aldyńǵy kezekke shyǵarylýda. Keden qyzmetkerlerine qatysty qozǵalǵan isterdiń 75 paıyzyn, sondaı-aq jemqorlyq zań buzýshylyqtardyń 92 paıyzyn ózimiz anyqtaımyz", deıdi QR Qarjy mınıstrliginiń Kedendik baqylaý komıtetiniń tóraǵasy Qozy-Kórpesh Kárbozov. Onyń aıtýynsha, halyq senimine ıe bolý úshin olar quqyqtyq zańbuzýshylyqtarǵa barǵan áriptesterin qatań jazalaýda. Máselen Kedendik baqylaý komıtetinde byltyr 959 qylmystyq is qozǵalyp, 11 myń ákimshilik materıaldar qaraldy.
