Keden qyzmetkerleri esirtki kontrabandasy áreketteri azaıyp kele jatqandyǵyna senimdi
ASTANA. Qazannyń 19-y. QazAqparat /Aıdar Ospanalıev/ - Elimizdiń keden salasynyń qyzmetkerleri keden shekaralarynda jyl basynan beri esirtkilik zattardy kontrabandalaýdyń 105 jaǵdaıyn anyqtady. Olardyń 55 faktisi ıisshil ıtterdiń kómegimen tabylǵan.
Anyqtalǵan esirtkilik zattardyń mólsheri 587,2 kılogramdy qurap otyr. Onyń 20,2 kılogramy geroın. Bul málimetterdi búgin Kedendik baqylaý organdarynyń 9 aıda atqarǵan jumystaryna baılanysty jýrnalıstermen bolǵan brıfıngte Qarjy mınıstrliginiń Kedendik baqylaý komıtetiniń Kontrabandamen kúres basqarmasy bastyǵynyń orynbasary Meıirhan Meıirmanqulov keltirdi.
Onyń sózine qaraǵanda, kedenshiler «baqylaýdaǵy taýardy tasymaldaý» ádisi boıynsha arnaıy júrgizilgen 7 sharaǵa qatysqan. Nátıjesinde iri kólemdegi esirtkilerdi ońtústik aımaqtaǵy respýblıkalardan Qazaqstan men Reseı arqyly TMD elderine tasymaldaýmen aınalysyp júrgen halyqaralyq deńgeıde uıymdasqan qylmystyq qoǵamdastyqtardyń joly kesildi. «Keden salasy mamandarynyń saraptaýlarynsha, esirtkilik zattardy kontrabandalyq jolmen tasymaldaý áreketteri jyldan jylǵa azaıyp keledi. Mysaly, esirtkini kontrabandalý áreketteri boıynsha 2006 jyly 192 is qozǵalsa, 2007 jyly 163, 2008 jyly 133, 2009 - 119 qylmystyq is qozǵalǵan. Al aǵymdaǵy jyldyń 9 aıyndaǵy kórsetkish 88-di qurap otyr», dedi basqarma bastyǵynyń orynbasary.
