Keden qyzmetkerlerine kólikti toqtatyp, tekserý quqyǵy berilmek

ASTANA. KAZINFORM – Memlekettik kirister komıtetinde mobıldi toptar qurylady. Olar EAEO elderimen shekaralas aýdandarda jumys isteıdi. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- Sońǵy jyldary taýarlarǵa arnalǵan deklaratsııalar (budan ary - TD) sanynyń ósýi baıqalady. Eger 2018 jyly taýarlarǵa arnalǵan deklaratsııalar sany 357 myń TD bolsa, 2025 jylǵy 10 aıda bul kórsetkish 819 myń TD-ǵa deıin ulǵaıdy. Kedendik operatsııalardyń ashyqtyǵyn qamtamasyz etý, sondaı-aq barlyq derekterdi ýaqytyly óńdeý maqsatynda júk leginiń edáýir ulǵaıǵanyn eskere otyryp, keden organdarynyń aqparattyq júıeleri jańǵyrtyldy. 2017 jyldan Birikken Ulttar Uıymynyń Saýda jáne damý jónindegi konferentsııasymen birlesip ázirlengen «ASTANA-1» aqparattyq júıesi kezeń-kezeńimen engizilip jatyr. Keden salasyndaǵy bıznes-protsesterdi jáne ruqsat berý qujattaryn odan ári avtomattandyrý úshin 2019 jyly «Biryńǵaı tereze» aqparattyq júıesi iske qosyldy, - dedi Oljas Bektenov.

Úkimet basshysynyń aıtýynsha, kedendik ákimshilendirýdiń biryńǵaı tsıfrlyq ortasyn qurý aıasynda «ASTANA-1» jáne «Eksporttyq-ımporttyq operatsııalar jónindegi biryńǵaı tereze» júıeleriniń fýnktsıonaldyq múmkindikteri jańa platformaǵa – «Keden» aqparattyq júıesine ıntegratsııalanǵan. Ony ázirleý 2024 jylǵy sáýirden bastap kezeń-kezeńimen júzege asyrylyp jatyr. Kedendik aqparattyq júıeler salasynda júrgizilip jatqan tsıfrlyq reformalar memlekettik bıýdjetke kedendik bajdar men salyq (budan ary – KBjS) túsimin ulǵaıtýǵa yqpal etti.

- Osylaısha, 2025 jylǵy 10 aıdyń qorytyndysy boıynsha 3 602 mlrd teńge somasyna KBjS tústi. 2024 jylmen salystyrǵanda túsimderdiń ósý qarqyny +18 % (3 051,3 mlrd teńge) boldy. Kedendik ákimshilendirý sharalary esebinen bıýdjetke qosymsha 153,7 mlrd teńge óndirip alyndy. Budan basqa, Qazaqstan Respýblıkasynyń 2025 jylǵy 17 shildedegi Zańymen «Qazaqstan Respýblıkasyndaǵy kedendik retteý týraly» Kodekske ózgerister engizildi. Onda mobıldik toptar qurý jáne olardyń qyzmet tártibin ázirleý jónindegi Qarjy mınıstrliginiń quzyreti keńeıtildi. Bul taýarlardyń qozǵalysyn baqylaýdy kúsheıtýge, kontrabandalyq jáne kontrafaktilik ónimder aınalymynyń jolyn kesýge baǵyttalǵan, - dedi ol.

Úkimet basshysynyń atap ótýinshe, mobıldi toptar EAEO elderimen shekaralas aýdandarda jumys isteıdi jáne kólik quraldaryn toqtatý, kedendik baqylaý men tekserýler júrgizý quqyǵyna ıe bolady.

- Osyǵan baılanysty kólikti toqtatý, tehnıkalyq baqylaý quraldaryn paıdalaný, tekserý, ilespe qujattardy tekserý quqyǵyn qosa alǵanda, ókilettikterdi keńeıtý maqsatynda Keden kodeksine tıisti túzetýler engizildi. Mobıldik toptardyń qyzmetin uıymdastyrý maqsatynda mobıldik toptardy qurýdy, olardy jaraqtandyrýdy, kólik quraldaryn toqtatý jáne tekserý, ýaqytsha saqtaý oryndaryna jetkizý jáne qajetti qujattardy resimdeýdi reglamentteıtin 4 normatıvtik-quqyqtyq akt qabyldandy, - dedi Premer-mınıstr.

Buǵan deıin Oljas Bektenov Senat depýtattarynyń quqyq qorǵaý mártebesi bar derbes Keden qyzmeti qalpyna keltirýge qatysty saýalyna jaýap bergenin jazǵan edik.