Keden beketterine sapaly baılanys arnalary qajet - Qarjy mınıstri
Eske sala ketsek, 2018 jyldyń 1 sáýirinde BUU Saýda jáne damý jónindegi konferentsııasynyń (UNCTAD) qoldaýymen Qazaqstanda elektrondy keden - «ASTANA-1» aqparattyq júıesi jumysyn bastaǵan edi.
Mınıstrdiń aıtýynsha, avtomattandyrýdy engizý deklaranttyń buǵan deıingi brokerlik baǵdarlamalarǵa, kedendik brokerlerdiń qyzmetterine jáne ýaqytsha saqtaý qoımalaryna jumsaǵan shyǵyndaryn edáýir azaıtýy tıis.
«Búgingi tańda ımport boıynsha taýarlarǵa arnalaǵan 16,3 myń deklaratsııa resimdelgen, odan taýarlarǵa arnalǵan deklaratsııalardyń 90% (14.6 myń) «jasyl dáliz» arqyly avtomatty rejımde shyǵaryldy. ıAǵnı, buryn syrtqy ekonomıkalyq qyzmet qatysýshysy qujattar paketimen mindetti túrde brokerge óz aıaǵymen baratyn, odan keıin broker deklaratsııalarmen keden organdaryna júginetin jáne tikeleı keden qyzmetkeri qabyldaıtyn sheshimdi kútetin bolsa, endi ol brokerge de kedenge barmastan, ınternet arqyly ózi derbes deklaratsııa bere alady jáne júıe arqyly deklaratsııasy shyqqany týraly habarlamany ala alady. Oǵan óz taýaryn alý úshin tek ýaqytsha saqtaý qoımasyna barýy ǵana jetkilikti», - dedi QR Qarjy mınıstri Baqyt Sultanov Úkimettiń búgingi otyrysynda.
Mınıstr syrtqy ekonomıkalyq qyzmet qatysýshylarynyń «ASTANA-1» aqparattyq júıesin engizý esebinen bosatylǵan aqsha qarajatyn taýar aınalymyna baǵyttaıtynyn, munyń bıýdjetke túsetin keden bajdary men salyqtarynyń qosymsha túsimin 2018 jyly shamamen 12 mlrd.teńgege, al 2025 jylǵa qaraı 20,3 mlrd.teńgege qamtamasyz etedi dep paıymdaıtynyn atap ótti.
Sonymen birge, B. Sultanov «ASTANA-1» aqparattyq júıesi boıynsha eki problemalyq máselege erekshe toqtaldy.
«Birinshi másele - keden beketterinde jyldamdyǵy joǵary baılanys arnalarynyń joqtyǵy. Spýtnıktik baılanys arnasynyń ótkizý qabileti málimdelgen talaptarǵa saı emes (málimdelgen 8Mbıt/s ótkizý qabiletiniń ornyna, 4 Mb/s ótkizý qabiletimen 2 arna bar), bul «ASTANA-1» aqparattyq júıesinde jumys isteýge múmkindik bermeıdi. Kem degende 40 Mbıt/s baılanys arnasy bolýy qajet», - dedi mınıstr.
Mınıstr aıtqan ekinshi jaıt - aıtylǵan júıeler boıynsha jýyq arada qosymsha vırtýaldy qýat resýrstaryn (Hostıng) bólý máselesimen baılanysty boldy.
«Aqparat jáne kommýnıkatsııalar mınıstrligimen jáne «Ulttyq aqparattyq tehnologııalar» aktsıonerlik qoǵamymen birlesip, bul máseleni pysyqtap jatyrmyz. Biraq osy jyldyń maýsym aıynda bizdegi búkil vırtýaldy qýat sarqylýy múmkindigin eskere otyryp, Baqytjan Ábdiruly Sizden Aqparat jáne kommýnıkatsııalar mınıstrligi men «Ulttyq aqparattyq tehnologııalar» AQ-na osy máseleni tezdetip qaraýdy tapsyrýyńyzdy suraımyn», - dedi B. Sultanov QR Premer-Mınıstrine.
Óz kezeginde QR Premer-Mınıstri Baqytjan Saǵyntaev aıtylǵan máselelerden habardar ekenin, olardy sheshý úshin birge jumys atqaryp jatqanyn jáne jalpy Astana-1 aqparattyq júıesiniń jumysynda oń ózgerister bar ekenin atap ótti.
