Keden beketterindegi baqylaý júk kólikteri ıeleriniń shyǵynyn týdyrmaý kerek - O.Samýhın
ALMATY. 22 shilde. QazAqparat /Ádilet Musahaev/ - Qazirgi qoǵam júk tasymaly jumysynyń jyldam ári qolaıly bolǵandyǵyn talap etip otyr.
Bul jaıynda búgin USAID damý baǵdarlamasynyń múshesi Oleg Samýhın Almatyda «Ortalyq Azııadaǵy halyqaralyq jol tasymaly júıesiniń tıimdi jaqtary» atty dóńgelek ústel barysynda aıtty.
O.Samýhın Ortalyq Azııadaǵy sońǵy 15 jylda osy salada atqarylǵan jumystardy saralap, damý jolyna nazar aýdarǵandyǵyn jetkizdi. «Kóbinde júrgizýshiler men qaýymdastyqtar keden beketterinde kóp ýaqyttaryn joǵaltatyndyqtaryn aıtyp shaǵymdanýda. Sondyqtan biz óz jobamyzdyń aıasynda osyndaı keleńsizdikterdiń oryn alý sebebin anyqtaý úshin birqatar jumystar atqardyq», -deıdi O.Samýhın.
Olardyń jobasy Ortalyq Azııadaǵy Qazaqstan, Qyrǵyzstan, Ózbekstan jáne Tájikstan sııaqty tórt eldi qamtyǵan.
Onyń aıtýynsha, júk tasymaldaýshy júrgizýshiler keden beketterinde uzaq kezekte turmas úshin 100-150 dollar berip ótýdi daǵdyǵa aınaldyrǵan. «Olardyń mundaı aqsha bermeske amaldary joq, óıtkeni kedende 2-3 kún turyp ýaqytty jáne taǵy basqa shyǵyndy keltirmes úshin osyndaı amalǵa barady. Sondaı-aq olardy mundaı áreketke ıtermeleıtin bir sebep óz quqyqtaryn durys qorǵaı bilmeýinde. Kóp jaǵdaıda baqylaýshy organdar olardyń júkterin shekten tys tekserip, jumysty kóbeıtip jiberedi eken. Bul qubylys Ortalyq Azııanyń barlyq elderindegi kedendik beketterde kezdesedi», -dep atap ótti O.Samýhın.
Jalpy Qazaqstannyń sońǵy kezde Kedendik odaqqa kirýi shamadan tys tekserý jumystaryn azaıtqan.
Sondaı-aq ol kóp júrgizýshilerdiń keden beketinde salynatyn elektrondy qulyptarǵa da kóńili tolmaıtyndyǵyn jetkizdi. Elektrondy qulyp salý jumysy jyldam bolǵanymen, ony qaıta alý kezeńi kóp ýaqytty alady eken.
O.Samýhın sonymen qatar ár eldiń kedendik beketteri birige jumys istegenderi tıimdirek bolatyndyǵyn jetkizdi. Ásirese, tájik-ózbek shekarasynda kedenshilerdiń bir-birine senim artpaı kólikter eki ret qaıtalanyp tekseriletin kórinedi. Sondaı-aq qazaq-ózbek shekarasynda da seriktestikti damytqan artyq bolmas degen oıyn jetkizdi ol. Máselen ózbek aǵaıyndar túnde jumys isteýge qulyq tanyta qoımaıdy. Bul óz kezeginde tańerteń júk tasymaldaýshy kólikterdiń úlken kezegin týdyrady.
