Keden beketinde esirtki zattaryn ótkizýdi anyqtaý faktileriniń kóbeıýi baıqalýda
Almaty. 1 qarasha. QazAqparat /Ádilet Musahaev/ - Aǵymdaǵy jyldyń sońǵy 9 aıynda Almatydaǵy «Jetisý» keden beketiniń qyzmetkerleri ekonomıkalyq kontrabanda boıynsha 39 fakti men kedendik tártipti buzǵan 156 ákimshilik materıaldy anyqtady. Bul jaıynda jýrnalıstik týr kezinde «Jetisý» keden beketi basshysynyń orynbasary Abzal Shógelbaev aıtty.
«Jetisý» keden beketi Almaty halyqaralyq áýejaıynyń qyzmet etý aımaǵynda ornalasqan.
A. Shógelbaevtyń aıtýynsha, bıylǵy jyly 439004 AQSh dollary, 23635 eýro, 40600 Qytaı ıýany, 1810 Reseı rýbli, 30 keli kúmis zergerlik buıymdaryn, 14,65 keli sary jáne aq metaldan jasalǵan buıymdardy ótkizý kontrabandasy anyqtalǵan.
"Bizdiń mamandar qyzmettik-izdestirý ıtterin qoldaný arqyly esirtki jáne psıhotroptyq zattardy izdeýdi júzege asyrýda. Kınolog-mamandardyń bolýyna baılanysty, keden beketinde esirtki zattaryn ótkizýdi anyqtaý faktileriniń kóbeıýi baıqalýda", - deıdi A. Shógelbaev.
2010 jyldyń 9 aıy boıynsha ushý zalynda 5168, qoný zalynda 5179 halyqaralyq reıs pen 510 706-dan astam jolaýshylar rásimdelgen. Sondaı-aq atalmysh kedendik beket "Qazposhta" AQ, TNT, DHL, Fedex, UPS, Pony express, ASE jáne taǵy basqa kýrerlik qyzmetter arqyly ótkiziletin halyqaralyq poshta jóneltilimderin rásimdeıdi. Sońǵy 9 aıda júktiń kedendik deklaratsııasy boıynsha 7737 halyqaralyq poshta jóneltilimderin rásimdegen.
Kún saıyn Almaty halyqaralyq áýejaıyna 20-dan astam júk reısteri qonsa, ýaqytsha saqtaý qoımalaryna 100 tonnaǵa deıin júkter ornalastyrylady eken.
