KEBCO munaı brendiniń iske qosylýy el ekonomıkasyna oń áser etti - Maǵzum Myrzaǵalıev
ASTANA. KAZINFORM – «QazMunaıGaz» kompanııasynyń ǵana emes, Qazaqstannyń búkil munaı-gaz salasyndaǵy mańyzdy oqıǵa – KEBCO – Kazakh Export Blend Crude Oil qazaqstandyq munaı brendiniń iske qosylýy. Bul týraly ulttyq kompanııanyń baspasóz qyzmetine bergen suhbatynda QMG Basqarma tóraǵasy Maǵzum Myrzaǵalıev aıtty.
Onyń sózinshe, Qazaqstan tarıhı túrde munaıdyń eki markasyn saýdalady: CPC – KQK qubyryndaǵy munaı qospasy jáne Urals – «Atyraý-Samara» qubyrynda aralasqan ártúrli munaı sorttary.
Reseıdiń teńiz porttaryna tasymaldaý kezinde qazaq munaıy reseılik munaımen aralasady. Sondyqtan ol Urals brendimen satyldy.
– 2022 jyldan bastap Urals markasyna degen jeńildik aıtarlyqtaı baıqala bastady. Osyǵan baılanysty biz KEBCO dep ataǵan ózimizdiń qazaqstandyq munaı brendimizdi naryqtarda ilgeriletýdi jón kórdik. 2022 jyldyń sońynda munaıdyń bul surypy alǵash ret shyqqan kezde ol Brent-ke shamamen 15-18 dollarǵa arzan baǵamen satyldy. 2024 jyly KEBCO Brent-ke 2-2,5 dollardan joǵary baǵamen satylýda. Bul bizdiń kompanııanyń ǵana emes, basqa da qazaqstandyq jeke kompanııalardyń ekonomıkasyna, tutastaı alǵanda Qazaqstannyń tanylýyna oń áser etti», - dep atap ótti QMG Basqarma tóraǵasy.
