QDB uzaqmerzimdi zaem retinde Biryńǵaı jınaqtaýshy zeınetaqy qorynan 65 mlrd. teńge alady

ASTANA. QazAqparat - Qazaqstan Damý Banki uzaqmerzimdi zaem retinde Biryńǵaı jınaqtaýshy zeınetaqy qorynan 65 mlrd teńge alady. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Qazaqstan Damý Banki» AQ Basqarma Tóraǵasy Bolat Jámishev málim etti.

«Biryńǵaı jınaqtaýshy zeınetaqy qorynan qarajat alatyn zaemshylar qatarynda Qazaqstannyń Damý Banki de bar. Biz BJZQ-nan alýdy josparlap otyrǵan 65 mlrd teńge, bul - óte qomaqty qarajat. Degenmen, bankte bar resýrstardy esepteı kele, bul qarajatty qurylymdaıtyn bolamyz. Osylaısha, aldaǵy birinshi toqsan qorytyndysy boıynsha biz portfeldi tıisti deńgeıde ustaı alamyz dep oılaımyn», - dedi B.Jámishev.

Onyń aıtýynsha, Qordan bólinetin 65 mlrd teńge oblıgatsııalyq baǵdarlama arqyly tartylady. «Men bul uzaqmerzimdi zaem bolady dep oılaımyn. Stavkasy naryqtyq deńgeıdi qamtıdy. Búgingi jaǵdaıda bul asa qajetti qarajat», - dedi Bank tóraǵasy.